[Page] [Page] VICTORIA Augustissimi Magnae Britanniae, &c.

REGIS Gulielmi Tertii, Qui Urbem & Arcem NAMURAE, A Gallis occupatam, fortiter obse­dit, & feliciter recuperavit, ex­pulso Gallorum praesidio.

LONDINI: Anno Domini, 1695.

A D Nobilissimum Illustrissimumque JOANNEM Magni Sigilli custodem, &c.

MƲlti fortasse mirabuntur, vir illustris­sime, quod tibi, viro in tam subli­mi dignitate collocato, hunc libellum tam ex­iguum dedicare non dubitaverim: Sed cum res tractet adeò praeclaras, illum omninò viro honorifico Inscribendum judicavi: Quin imo sub cujus nominis patrocinio potius, quam tui, po­ema hoc de Victoria Augustissimi magnae Bri­tanniae, &c. Regis Gulielmi Tertii, in lucem ederem? quum te ille singulari favo­re prosequatur, quod multis praeclaris indi­ciis demonstravit: Nam te magni sigilli cu­stodem [Page] creavit, tibi munera officii sui rega­lis, se absente, obeunda commisit, adjunctis tibi sex aliis viris perspectae in Regem fidei, & in patriam amoris; quanquam vix ulli ex hoc praeclaro septemviratu aliter mihi quam fama noti sunt, excepto teipso, & Illustris­simo Comite Pembrokiae, viro omni litera­tura expolito, nec minus virtute & morum suavitate, quam genere & natalibus illustri, qui me plusquam semel aut bis familiari dig­natus est alloquio, & egestatem meam mul­toties munificè sublevavit. Certe magna gau­dendi causa est Omnibus bonis, quod tibi bonitate, eruditione & prudentia tam praeclaro & insigni tanta obtigit autoritas; qua pios foveas, im­pios coerceas, egenos subleves, & latè in om­ne genus hominum bonitatis & virtutis tuae documenta diffundas; juxta illud Prov. 11. 10. Solomonis proverbium, Cum bene est justis, Civitas laeta­tur: Nec silere possum insigne virtutis & pie­tatis [Page] tuae specimen, quod nuper edidisti, cum illum ipsum diem dominicum, quo publica gratiarum actio imperabatur, propter victori­am nuper partam, vulgus, quod in vitium flecti cereum est, impia profanatione faedare parabat, nisi tua illos coercuisset autoritas. Jeohova est Deus sanctus & zelotes dixit Josh. 24. 20. Joshua Is­raelitis, si deseratis Jehovam & serviatis diis alienis, ille convertet se, & nocebit vobis, postquam vos beneficiis prosecutus est. Non­ne si tale flagicium fuisset illo die commissum, expectanda erat vindicta caelitus depluenda cum in autores tum in permissores tantae impietatis? Idciro gratias tibi agunt omnes pii quod auto­ritatam tuam tam piè & prudenter & opportunè exercuisti. Vir illustrissime, humanitas & benig­nitas tua jamdudum mihi multis experimen­tis perspecta, spem fecit te meam hanc au­daciam boni consulturum. Faveat tibi De­us [Page] omnipotens & multa te in hac vita felici­tate occumulet, & post hanc vitam sem­piternis in Coelo praemiiscoronet.

Sum servus tibi devinctissimus; G. HOGAEUS.

AD Nobilissimum Illustrissimumque JOANNEM Magni sigilli custodem, Anglicanae gentis & nobilitatis Ornamentum, patriae Columen, bonorum sola­tium, malorum terrorem, Omnis pietatis Virtutis & eruditionis patronum.
ἘΓΚΩΜΙΑΣΤΙΚΟΝ

QUis laudes numerare tuas, quis carmine digno
Nomen ad astra tuum radiantia tollere possit?
O saecli stupor atque decus, cui vivida virtus
Post diadema locum tribuit regale secundum.
Ingenium Caeleste tuum velocius annis
Progreditur, lentaeque pati dispendia nescit
Ulla morae. Subitis volitavit in ardua pennis,
Donec ad hunc scandendo gradnm pervenit honoris,
Quo nihil insano vel caeca superbia fastu
Celsius expectet, vel mens moderatior optet.
Haec meritis venêre tuis: Nam quamlibet ortum
Ducis honoratae generoso à stemmate gentis,
Tu genus & pro [...]vos, & quae non feceris ipse
[Page] Haec tua vix dicenda putas. Majoribus altis
Praeluces, generique novum superaddis honorem.
Atque hinc regalis tibi leniter aura favoris
Afflat, & hinc pariter proceres te & vulgus adorant.
Omnibus hinc aliis te Rex te praesicit unum,
Et tibi ducendas populi commisit habenas.
Ingenii virtute tui, curaque fideli
Nititur, ad nutusque tuos Regnum omne ministrat.
Sic Pelusiacis quondam Josephus in oris
Sub Pharaône bono imperii retinacula rexit,
Arbitrio dans jura suo per rura, per Urbes.
Justitia viduis, puerisque parentibus orbis
Auxiliare tua, nec vi nec fraude potentes
Insultare sinis tenui trepidóque clienti.
Exhilaras pietate bonos, & acumine doctos,
Munificáque manu miseros, patremque salutant
Pierii te turba chori. Genus omne virorum
Te celebrant, gaudentque tuas diffundere laudes,
Et te Nestoream cupiunt superare senectam.
Libenter obtulit G. HOGAEUS.

AD Augustissimum Magnae Britanniae, &c. REGEM Gulielmum III. POST VICTAM NAMURAM.
ΠΡΟΣΦΩΝΗΤΙΚΟΝ.

NUper ego tacitus segni in squalore jacebam;
Nunc animum novus ardor agit, flammáque recenti
Mens furiata novos gestit cantare Triumphos;
Et laudes, Gulielme, tuas, bellique labores
Altisonâ celebrare tubâ. Quo scandere tento?
Nec Phaëtontaeae timeo mala fata ruinae?
Sed Musâ stimulante trahor. Quid martia mundi
Heroäs, Regina, tuos, Roma inclyta, jactas,
[Page 2] Scipiadas, Curios, Marios, fortemque Camillum?
Hos omnes splendore suae virtutis obumbrat
Heros Nassovius, velut omnia sydera Titan,
Dum meliore novas acquirit nomine palmas.
Huic etenim Deus, aetherii regnator Olympi
Dexter adest, tutumque sui munimine Scuti
Praestat ubique, trucem quoties violentus in hostem
Irruit, & qua tela videt densissima tendit
Acer equo; nam pro populis non ulla Britannis
Fata fugit. Mediis Poenorum qualis in arvis
Jejunus movet arma leo, gaudetque comantem
Excutiens cervice jubam, & fremit ore cruento
Impavidus, sic ille ruit mucrone minaci
Tela inter media, atque inimica per agmina praeceps.
O magno dilecte deo, tibi militat aether,
Atque tua Angelicae veniunt ad classica turmae,
[Page 3] Instantesque tibi depellunt undique mortes.
Hinc sacrum violare caput pavefacta recusant
Fulmina, Sulphureae impulsu volitantia flammae.
Ferrea grando tuas innoxia transilit aures.
O quoties dextrâ qui proximus atque sinistrâ
Qui stetit, ictus obît subitò, & poene obruit ipsum
Fulminei vis saeva globi?
2 Sam. 21. 15, 16, 17.
Sic poene cadebat,
Ishbibenôbe, tui trajectus vulnere ferri
Sanguine Jessaeo genitus, nî in tempore ferret
Armipotens Abisaeus opem, qui te, licet ortum
Stirpe gigantaea, valido mox ense ruentem
Dejicit, & multâ porrectum extendit arenâ.
Dan. 3. 24, 25.
Haud aliter rapidae quondam patientia flammae
Corpora terna virûm, Assyria in fornace jacentum
Facta fuêre, in quos ignis nil juris habebat:
Aeternoque dei nato comitante triumphant
[Page 4] Ignibus in mediis laeti, celebrantque choraeas,
Ceu pedibus pulchri premerent viridaria prati.
Tu quoties in bella ruis, victoria gressus
Antevolat, Gulielme, tuos, Regisque perennis
Numine perrumpit florentes aere phalanges,
Altáque turrigeri subvertit culmina muri.
Ipsa Namura tuis obsistere viribus, etsi
Illam hinc vasta palus, hinc ardua maenia cingant,
Non poterat; prostrata graves dedit illa ruinas
Milite cincta tuo, requiemque capessere nullam
Sustinuit. Gallis adeò trepidantibus instas,
Urbem ut sponte tibi linquant, & in arce tegantur.
Arx tamen ipsa nequit requiem concedere fessis,
Sic tu fulmineis illam, licet undique firmam,
Nocte dieque globis labefactam à sede revellis.
Interea dubii metuens discrimina belli
[Page 5] Ignavus Lodoïcus abest, semotus ab omni,
Armorum strepitu, atque ducum dum facta suorum
Arrogat ille sibi, falsaeque cupidine famae
Uritur, exornans alienis corpora plumis,
Armat, & armata emittit centena virorum
Millia, qui spatium Flandrae telluris inundant,
(Sic vanos generare metus sperabat) & hosti
Ante expectatum, positis & in agmine castris
Stant propius, jam (que) arma tenent, pugnam (que) minantur
Sanguineam. Sed nulla tamen stratagemata possunt
Gallica magnanimis terrorem inferre Britannis
Angligenis Scotisque, unitis viribus arcem
Dum quatiunt simul, & magnâ nituntur opum vi.
Sint licet adversae numero majore catervae.
Ipse etiam Gulielmus adest, animosque Britannis
Addidit, & sociis sacrato foedere junctis,
[Page 6] Ense minax, vultuque ferox, in utrumque paratus,
Arcem igni jaculisque petens, & comminus hosti
Obvius ire parans: Haec agmina Gallica spectant,
Nec licet obtectum ulteriùs cohibere timorem,
Sed sensim revocantque pedem, timidéque recedunt,
Hinc pavor obsessos adeo circumtonat hostes,
Virtutem, Gulielme, tuam, sociûmquae stupentes
Ut tibi concessis simul urbe atque arce Namurae,
Sanguinei que sola fuit spes maxima Galli,
Cogantur miseram pacti discedere vitam,
Cumque pudore gravi redimant breve dedecus aevi
Ergo Jacobitae cur spem lactatis inanem
Amplius? urbs, rabidi robur tuteláque Galli
Maxima que fuerat, nunc à meliore tenetur
Principe. Perge igitur, Gulielme, invadere Gallum
Nam latè patefacta via est, nihil obstat eunti.
[Page 7] Perge, nec ulla tuos teneat mora lenta Triumphos,
Persequere attonitum ferro flammaque tyrannum,
Ante tuos dum sponte pedes procumbere cogas,
Subjiciatque tibi sese quasi vile scabellum.
Sola Namura, tuis poterat quae obsistere caeptis,
Succubuisse tibi gaudens, tua jura recepit.
Sed tamen ante tuum redeas invisere Regnum,
Aspectúque tuo populum, vultuque Britannum
Laetifica, qui te, quasi rur sum à morte reductum
Accipient. Proh quanta animos formido piorum,
Quantus ubique pavor tenuit, rumoribus omnem
Quando Jacobitae falsis fremuêre per urbem;
Occidit ante diem subito Rex vulnere victus!
In tenebris flevêre pii, vulgusque malignum
Extulerat caput, atque altâ cervice vagatur,
A Batavis donec rediens bona fama remotis,
[Page 8] Gaudia va [...]a malis aufert, fanctisque timorem.
Gen. 37. 32, 33. & Gen. 46. 29, 30.
Haud aliter natum rabidarum dente ferarum
Discerptum Patriarcha vetus lugebat inani
Cum gemitu, & vanis lachrymis, iterum (que) triumphans
Laetitiâ, tanquam redivivum à morte reductum
Aspexit Pharias latè dare jura per oras.
Ergo resume animos pietas, hilarique triumpho
Laetitiam testate tuam; vivitque vigetque
Nassovius, tutela tibi & fortissima turris
Aeterni bonitate dei. At lugete scelesti,
Nunc etenim vestrae spem praesidiumque catervae,
Nunc magis atque magis Lodoicum adversa fatigant,
Pronus & in subitam vergit miser iste ruinam.
Sic semper vigeat, semper pia turba triumphet,
Sic scelere usque suo pereat sceleratus in aevum.
FINIS.

This keyboarded and encoded edition of the work described above is co-owned by the institutions providing financial support to the Text Creation Partnership. Searching, reading, printing, or downloading EEBO-TCP texts is reserved for the authorized users of these project partner institutions. Permission must be granted for subsequent distribution, in print or electronically, of this EEBO-TCP Phase II text, in whole or in part.