Nous Robert d'Eu­reux, Comte d'Essex & d'Eu, Visconte d'Hereford, Baron Ferriers de Chartley, Bourchier, & Louayn, &c. & Charles Howard, Baron d'Essingham, grand Ad­miral d'Angleterre, &c. Ayanslacharge d'une armée Royalle de mer, qu'il a pleu a sa serenissime Maiesté nostre Souueraine la Royne d'An­gleterre, France, & Hiberne, &c. d'esquipper & mettre pre­sentement en mer, Faisons scauoir a tous que la dicte armeé qui nous est bailleé en charge, est par sa Maiesté ordonneé & destinee a l'encontre des grandes & puissantes forces que le Roy d'Espagne a desia en Main, & contre les preparatifs qu'il fait de Iour a autre pour les accroistre & augmenter d'hommes & de nauires, qu'il recerche de tous costez pour enuahir les Royaumes de sa dicte Maiesté, comme nous en sommes aduertis de tous les endroits de la Chrestienté, selon son premier dessein & suiuant l'enterprise [Page 2] qu il auoit en l'an 1588. (alors mesmes qu'il se traitoit entre eux de la paix par les deputez assemblez de part & d'autre) auec vne armeé la plus puissante qui fust iamais mise sus de son temps, com­bien que par la grace de dieu & la valeur, & preud'hommie de ses feaulx & bien aimez subiects, elle ait esté du tout aneantie. Et d'autant que sa dicte Maiesté a bonne intelligence, & perfaite a­mitié, auec tous les Rois & potentats de la Christienté sinon auec le dict Roy d'Espagne, qui depuis plusieurs anneés en ça a tresiniu­stement & ouuertement faict ample demonstration d'inimitié par diuerses meneés, tant a l'encontre de sapropre personne, comme aussy contre son peuple & ses païs, sans que sa Maiesté luy ait auparauant donné occasion de ce faire. A ces causes, Nous susdicts Comte & Admiral asseurons toutes personnes, qu'il nous est tresexpressement commandé par sa dicte Maiesté: de ne rien attenter au preiudice d'aucune nation, sinon sur les subiects na­turels du dict Roy d'Espagne, ou tels autres estrangers, qui ser­uiront & assisteront le dict Roy d'Espagne de moiens d'hommes, nauires, viures, munitions, & de telles autres prouisions pour fauoriser son enterprise a l'encontre de sa dicte Maiesté. Lequel commandement de sa dicte Maiesté nous entendons obseruer tres­estroictement, & auec tout debuoir. Et partant nous enioignons & commandons expressement a toutes personnes, ayans charge soubs nous en ceste armeé de n'y contreuenir, en ancune sorte sur peine d'estre en ce cas rigoureusement punies; & pour encores e­uiter toutes les occasions qui pourroient introduire des difficultez touchant ceux lesquels n'estans point subiects du Roy d'Espagne peuuent toutes fois estre par nous attaints & conuaincus d'aider & assister aux forces du dict Roy d'Espagne ou sur mer, ou sur terre, d'aucunes prouisions en faueur de sa dicte entreprise con­tre sa Maiesté. Pour l'es claircissement de ceste doubte nous re­querons bien instāment, & au nom de Dieu toutes personnes qui ne sont subiects naturels du dict Roy d'Espagne, & qui toute [...] ­fois [Page 3] l'ont assisté de leurs nauires, viures, & munitions, comme il a esté cy dessus mentionné, qu'ils aient a retirer tous leurs dicts nauires, appareillez pour la guerre & toutes autres semblables pro­uision▪ destineés a mesme effect, tant de tous les ports & haures d'Espagne & Portugal, qu'aussi de la flotte & du seruice de l'ar­meé du dict Roy contre la nostre, & auec icelles ou retourner en leur proprepaïs, ou bien, si bon leur sēble, de venir trouuer nostre armeé. Et nous leur promettons au nom sacré de sa Maiesté, toute garentie tant de leurs personnes que de leurs biens, d'estre trai­ctez & maintenus comme amis, & d'auoir permission de tenir en leur libre possession & dispositiontous tels nauires & prouisions, qui auront esté arresteés par le dict. Roy, ou aultrement destinees a son seruice, & que les proprietaires auroient retirez pour ne les emploier en tel affaire, pourueu que tousiours ilz se compor­tent auec leurs dicts moiens comme amis, & non pas comme en­nemis a sa Maiesté, & a nous ses Lieutenans. Et si aucuns y a lesquels (nonobstant cest aduertisement de la volonte & inten­tion de sa dicte Maiesté, & de nostre promesse a tenir la main a l'obseruation d'icelle le plus deuement que faire se pourra) mon­strent directement refuser nostre presente offre et qui ne mectent peine de satisfaire, a nostre tant iuste requeste, qui tend à leur propre bien & a leur liberté: Allors nous aurons iuste occa­sion, comme par les Loix des armes il est permis, d'arrester & de nous saisir de tous ceux, qui feront refus de nostre dicte offre, comme de ceux qui aident ouuertement le dict Roy d'Espagne de leurs forces & moiens, pour s'emparer des pais de sa dicte Ma­iesté, comme estans ennemis manifestes. Et sur ce refus en cas qu'illeur arriue quelque inconuenient par attentats qui pourront estre faicts contre leurs personnes, nauires, & biens par ceux de nostre armeé pour auoir adheré au seruice du Roy d'Espagne, Ilz n'auront nulle iuste occasion de s'en plaindre puis apres ou d'a­uoir recours a leurs princes & Seigneurs naturels pour moienner [Page 4] la reparation & la restitution de leurs pertes. Et pour donner plus grande intelligence & confirmation de ce que dessus, nous auons trouue bon d'apposer nos seings & seaulx a l'original de la presente pour estre veu de ceux qui en desireront auoir la lecture & la cognoissance. Et l'auons aussy faict imprimer en françois, Italian, Flamen, & Espagnol, Et en outre en auons faict distribuer par tout ou nous auons peu es ports d'Espagne & Portugal, afin qu'ilz en aient tant plus de cognoissance, tant esdits ports qu'ailleurs de son obeissance.
(⸪