VOus debues scauoir, Amy Lecteur, qu'au Royaume d'Angleterre il est aduenu au temps su [...]dict, qu'un ieune Gentilhomme nommé le Sieur Dorrington natif de la contrée appelleé Spaldewick au Contè d'Huntington, et qui est de la garde du corps de sa Maiestè, auoit entre autres vn tres beau & bon Cheual, lequel il tenoit fort cher, & le faysoit curieusement pancer, qui sans donner aucun signe d'estre malade mourut promptement, qui estonna tellement cedict ieune gentilhomme par ce soudain euenement, que desirant d'en scauoir la cause se resolut de le faire ouurir, ce qu'ayant estè faict, fut trouué au trou du coeur dudict Cheual dans lequel on apperceut vne vessie de la grosseur d'un gros crapaut, dans laquelle on trouua le ver qui vous est icy representè, qui aussy tost apres l'ou­uerture qui luy fut faicte s'estēdit en la forme semblable que le voicy, & de paréille couleur que le po [...]sson qu'on nomme Macquereau, ayant le bec, les yeux & t [...]us ses rameaux pareils a ce que vous est icy depainct outre il auoit en les parties de derriere quatre endpoits par lesquels il vuydoit des gouuttes d'eau rousse. Sa longeur estoit de dixsept doigts, & sa grosseur de troys doigts & demy. Et se re­congnut que cest animal fut sans doubte cause de la mort du pauure Cheual, qu'il ne suruesquit de queres. Et ne pense qui se soit iusques a ceste heure Ʋeu vne semblable beste, ny digne de tant d'estonne­ment. De sorte que l'on doibt estre esmeu a consyderer les secrets & esmerueillables effaits de la puyssance de Dieu, sur toutes ses createures.

Les noms de ceux qui se trouuerent présens & virent le ver.