MA-DAME encor que les actions humaines soyent dissemblables, si est-ce qu'elles ont cecy de commun, de tendre toutes à quelque fin: mais ô heureuses & louables céles dont les Autheurs ne se soucians pas tant de leur profit par­ticulier ont plus d'esgard au public comme il se peut voir non seulement aux tresillustres maisons, dont vous estes extraite & alliée: mais en vostre per­sonne, qui par la memoire du passé, & esperance du futur, semble estre pre­destinée pour la subuertion de l'ignorance, & pour l'amplification de la louable vertu. Or comme en ce siecle (esgoust de la malice des autres) il à pleu à Dieu nous donner icy vn heureux repos, accompagné de la lumiere de sa Parole sa­crée, soubz le tres-heureux regne de sa tres-sidele, & nostre Tressérénissime ELIZABET à bon droit par sa Prouidence Royne de ces Pays, aussinous à il concédé la réuolution des Arts suscitant plusieurs gentilz Espris, qui se sont donnez la main pour communiquer aux autres ce qu'il luy à pleu leur impartir, en quoy i'ay volontiers & selon mon petit pouuoir tasché de les suyure en si louable entreprise, dressant vn petit Liuret ayant choysi d'entre les Animaux, quelque nombre de Bestes & d'Oyseaux des plus remar­quables, non seulement de ceux qui se blasonnent aux Armoiries des Seigneurs: mais aussi qui sont plus [Page] plaisans à l'oeil, & que l' Admirable Ouurier de Nature à mieux peins & bigarrez, ayant accompagné les dits Animaux d'autant des plus belles Fleurs & Fruitz, que i'ay pensé les plus propres, le tout apres le vif, lesquelz pourront seruir, à ceux qui ayment & desirent d'aprendre choses bonnes & honnestes, entre les­quelz il se trouue de la ieunesse, tant chez les Nobles que parmi les Artisans, les vns pour leur preparer en l'Art de Peinture, ou Graueure, les autres pour estre Orfeures ou Sculteurs, & aucuns pour la Broderie ou Tapisserie, & mesme pour toute sorte d'ouurage à l'éguille, de toutes lesquelles Sciences la Portraiture est l'entrée, & sans laquelle nul ne peut venir à perfection: & pourtant (Ma-Dame) que ie say que vous portez faueur aux Arts plus Liberaux, te me suis enhardy de vous dedier, ce que i'en ay faict pour le mettre en lumiere, soubz la protection de vostre nom, qui luy seruira comme d'vn Escusson, contre les antiques ennemis de vertu, non que te l'estime digne de ce que bien vous meritez: mais comme vne chose qui estant profitable à tous, semble d'elle mesme s'offrir à vostre grandeur, m'asseurant que mabonne volonté sera plus receuable que l'ouurage, qui n'est digne d'en approchér que de bien loing, receues-le donc s'il vous plaist auec céte bonté accoustumce, qui ne vous rend moins aymée entre les petis, que vostre scauoir vous faict estimer en­tre les grandz, & lors que vostre hautesse n'aura dedagné ce mien labeur, m'estimeray tres-heureux, & seray d'autant plus accouragé à par-a-cheuer ce qui en reste. A tant Ma-Dame te supply' a celuy du­quel les graces vous sont richement departies, vouloir con­tinuer l'accroissement de vostre honneur perpetuel & heureuse felicité de Londres ce xxvi. de Mars.