Text : "Brokmerbrief" (The Law of Brokmerland) Language : "Classical" Old Friesian Manuscript : B2 - "Second Brokmer Manuscript", 1345, Niedersaechsische Landesbibliothek (Sign. XXII 1423) Notes : A text in machine-readable form of the B2 manuscript of the Old Friesian Brokmerbrief. The text follows Buma and Ebel's 1965 edition, ("Altfriesische Rechtsquellen", volume 2, Goettingen, Vandenhoeck and Ruprecht). N.B. All Buma and Ebel's editorial emendations are adopted in this text, *without comment*. Similarly, all ms abbreviations are silently expanded. Sections of the MS are numbered, eg. $4, $6a, etc. The bracketed section numbers, eg. (= Rq. $3a), refer to the numeration of von Richthofen, "Friesische Rechtsquellen", Berlin, 1840. Full details of the manuscript and its relation to the B1 version of the text, together with a translation into German, can be found in Buma and Ebel. For more general information on Friesian, consult: T L Markey, "Frisian", Mouton, the Hague, 1981 (Trends in Linguistics, State of the Art Reports, 13) B Sjoelin, "Einfuehrung in das Friesische" (= Sammlung Metzler M86), J B Metzlersche Verlagsbuchhandlung, Stuttgart, 1969 This text has been checked carefully, but its accuracy cannot be guaranteed. caveat lector. -------------------------------------------------------------------------------- $1 (= Rq. $1). Thit ist thiu forme kere, ther Brocmon ekeren hebbath, thet hira rediewa skelin thingia hira ierim vt andene ende. $2 (= Rq. $2). Alsa tha rediewa alra erest ongungath and to hape kemen send, sa skelen hia al vnder ena suera eta mena loghe oppa sancte Iacobe, thet hia buta penningum and buta bedum helpa skele tha erma alsa tha rika and tha fiunde alsa tha friunde. $3 (= Rq. $3a). And sprecma thene rediewa on vmbe tha lessa meyde ief vmbe tha marra, sa vndgungere mith sex monnum vnder tha forma and vnder tha other berninghe, and hi se selva thi soginda; and thi talemon wite tha sibbe, ther vr thene sueren heth, ther tha werde leda skel mith sex ethum; and thi talemon vndvnge ac alsa vmbe tha meyde, and tha redieua driwe thet riucht forth fon tha talemonnem, ther thenna weldech send; and hveder sa tha redieua ioftha talemonne thius werde brech, sa reke hi tha liudum achta merch and tha rivchthrum ene halwe hageste merk, and thi clagere bisvere sine meyde; and ne driuath tha talemon ioftha redieua thith riucht naut forth, sa geie hia mith achta mercum. $4 (= Rq. $3b). Fon wernim biiecht. Hwersa ma sprech vmbe werna, hia se lessa ieftha marra, and se biiet tofara sine eyne redieva, ther se vnder stonde inna there herna, and hi alsa rede, sa drive hi se withe bi achta mercum, and tha tuene mith him stonde; and neth hi se naut, sa se hi urleren; fon thisse tichtega set alsa den, sat fon othere redenem, and thi redieua wite tha werna, hu stor se se; and ni se se naut biiecht, sa vndgunge hi mith sinre eynre sele. $5 (= Rq. $3c). Fon golde. Hwersa ma sprech vmbe en gold and spreke: "ic nebbe nen vndhent", sa vndgunge hi mith sinre sele. $6a (= Rq. $4). Thera redliewana ierim skel stonda to tha sunnandei bifara Walburghedei. Is thi Walburghedei a sunnandei, sa halde ma thene erra. $6b (= Rq. $5). And thet wellath Brocmen, theter alrec redieva sette sine helgenamonnum enre engleskere merk werth goldes inna warwe thrim wikem er tha sunnandei, er se ofgunge eta mena loge; and hia kethe him thene frethe bi achta mercum; and dether aeng liudamon tha rediewa engne skatha, sa felle hit a tuira wegena, and thi rediewa bisuere sinne skatha. $6c (= Rq. $6). And tha rediewa kethe vt alle riuchte frethar fiuwertene nachtem er tha ofgonge; ursteppe se engne frethe witlike and hi werthe vrwennen, sa fellesene tuiskette; ieftha vnriuchte vtkethe, sa fellesene selwa enfaldech. $7a (= Rq. $7). Efther there kethene skiffere alle Brocmon eta mena loge vmbe thet talelen, hvam hit fon riuchte bera muge; and hi nebbe nenne tichtega hewed binna iera vnder tha redskipe withe thene rediewa ieftha enne otherne mon fon alsadene tichtega, thet thi rediewa ret hebbe; and nanen liudamon vnge inna thet talelen er there skiffene bi achta mercum ieftha wittha skiffene sinra bura. $7b (= Rq. $8). And sa nime tha talemen thet rediewena gold eta helgenamonnum and riuchte elle riuchte tuisk thene liudamon and thene rediewa. $8 (= Rq. $9). Sprechma on thene talemon vmbe enne vndom, and tha tuene thene ena and thet bref inna warwe naut ne friaie - eider hira mith sex ethum, hi selwa mith him -, sa reke hi achta merc tha liudum fore thene redieua, and thet hus lidze gresfelle; sa kethe thet vt tha talemen, ther thenna weldech send. $9a (= Rq. $10). Fon talemonnem . Alsa tha talemen ongungat, sa swere se enne stawadne eth oppa sente Iacobe, thetzet elle riucht makie tuisk thene rediewa and thene liudamon. $9b (= Rq. $11). And alsa monege talemen skelenre wesa sare rediewena, and en half ier skelin hia weldech wesa, and naut lengra. $9c (= Rq. $12). Ac werthat Brocmen thes to rede bi liuda skiffene, thet ma othere talemen nime oppa tha erra, sa se tha erra and tha letera allike longe weldech. $9d (= Rq. $13). And binna sex wikem skelin tha talemen tha rediewa siker makia ioftha skeldech; alsa skelin tha nia talemen tha alda siker ieftha skeldech machia bi achta mercum and bi tha huse; and hira gold inna warwe withe te retsande; thet skelin driwa tha rediewa withe, ther thenna weldech send, alsa fir sa hi herech se; nis hi naut herech and hi tha keddar wende and hia naut fa ne muge, sa fe se oppa thet gold vmbe thene brecma. $9e (= Rq. $14). And vr ene talemen and ur ene rediewa se alreck weldech, alther ur sueren is, and naut ferra. $9f (= Rq. $15). And thet wellat Brocmen, thetta talemen nenne brecma ne nime eta hana vmbe tha lestene binna dei and binna ene monde bi tuam hageste mercum; and thene brecma skelin withedriwe tha rediewa, ther thenna weldech send, tha hana withe inna tha hond, and thi talemon rekene selwa tha liudum; and tha tua merc vt to kethande and efter to lestande tha sithum eta letera thinge. $9g (= Rq. $16) And deth thi talemon aenge monne eng vnriuth, sa riuchte thet sine sithar bi tha brewe, and thene thictega vprivchte hi, and achta merc retze hi, and sin hus ne berne ma naut $lOa (=Rq. $17). Fon keddum. Alle keddar se en ier weldech, buta talemonnum; iof hir aeng mon wel weldech wesa leng sa ier, sa geie hi mith achta mercum. $lOb (= Rq. $18). And nen ked and nene rediewa ni moten ketha ni achta ni riuchta inna ene otheres welde, er tha othere ofgunge; and alrec mon se weldech vr sine eyne herna and naute ferra bi achta mercum. $11 (= Rq. $19). Fon helgenamonnum. Alrecke burar biskife sine eyne redieua, inna hoke herna hit felle; sziwa hia, sa skethe thet thi helgenamon, ther vr tha herna sweren heth. $12 (= Rq. $20). Sprech thi rediewa, thettet him naut bera ni muge, sa biwerie thi helgenamon thet mith tuelf ethum oppa hoke helgum sa ma him tofara brendze, and thi witherlaga mith tuelef; and ni geng thi rediewa naut on bi thera helgenamonna redene, sa geie hi mith achta mercum. $13a (=Rq. $21). Sprech ther en other helgenamon, thettet him bera muge thet redskip, sa due hi alsaden riucht; sprecma on thene helgenamon, thettet him bera muge, sa skeppe thet sine nesta mith alsadene riuchte. $13b (= Rq. $22). Fether aeng rediewa ieftha talemon ieftha helgenamon ieftha eng liudamon inna otheres herna, sa geie hi mith achta mercum and mitha huse, hi ne iewet a wald, alsa thi other thet thria biclagad hebbe inna warwe; and ne clagath hi naut, sa geie hi selwa; and thet kethe vt tha rediewa, ther thenna weldech send. $14 (= Rq. $23). Sprech ther en other, thettet him bera muge thet redskip, sa due hi alsaden riucht. $l5a (= Rq. $24). Fon rediena bronde. Iof Brocmen thes to rede warthat, thet hia tha rediewa berna welle, sa hebbe tha talemen tha wald, inna hoke fiardandele se thenne brond biienne. $15b (= Rq. $25). Sa ne skel mar naut aweinima, naut aweidrega, al skel ma hit berna; hir ne skel ma nenne walla demma, nenne werf delwa, nen holt, nenne fecht vphawa; hwasa thit deth, sa skel hi tha liudum achta merc resza and efther te ieldande; thet skel thi rediewa mith sinre sele biweria. $16a (= Rq. $26). Slitter aeng rediewa er tha riuchta dei auder wach ioftha rhoof, sa resze hi achta merc. $16b (= Rq. $27). Vrwaxt hir aenge monne sin hei, thet hine rediewa berne er tha riuchta dei, sa resze hi achta merc. $16c (= Rq. $28). Al thetter breszen ioftha berned ioftha rawad werth, thet skel thi redieua biswera, and efter skel thi bernere thet ielda. $16d (= Rq. $29). Hwersa thi rediewa alsa sit, thet ma hine berna naut ne muge, sa drege ma hit of tha werue; skiether aeng skatha fon, sa ielde hit, ther tha glede onstet, and thi rediewa bisvere sinne skatha. $16e (= Rq. $30). Fon hwammes vndome sa thi rediewa werth vrwennen, thi stete thene brond on, iof ma hit berna muge, bi achta mercum; mei ma hit naut berna, sa drege ma hit of tha werwe, and wel mot ma him helpa bi talemonna worde; and elles ne mot nanen liudamon brond onsteta bi achta mercum; and alsa due hi tha thrim redievem, ther fon ene vndome werthat vrwnnen. $17 (= Rq. $31). And hwasa tha redieua thenne brond onstet eta redieua suiue, sa wardie hi thes alsa longe, sa tha talemen and tha liude oppa werwe send, and efter wardie hi selwa, ther thet hus ach. $18 (= Rq. $32). Fon rediena huse. Alsa fir sa thi redieua en eyn hus hebbe, hit se werra ioftha betera, sa tidie tha liude alder oppa; nether nen hus and hi werthe vrwnnen, sa resze hi fiwer hagesta merc fore thet hus. Senter brother ioftha sundre, and hira hus ne se er naut deled, er hi thene eth vndhente, sa se thet hus allegadere andere geie; ist er edeled, sa geie hi mith sine eyne dele. $19 (= Rq. $33). Fon rediena onspreke. Vvel mar enne rediewa onspreca vmbe enne vndom, sa skel ma hine onspreca thes selwa deis, ther hi ret anda warwe, and wernia oppare stede inna warue; and thene thichtega to endgiande, er ma of tha warwe gunge; and thi rediewa skel se halda, ther him alra nest is, ther thenne vndom edeled het; and alsadene werna skel ma nima, sa ma thenna het. Sa skelin tha thre thenne dom a hond nima and skiriane, hweder hi enne riuthne dom deled hebbe sa naut; vrwinne hia hine, sa skelen hia thene tichtega elle riuth makia; ac fraiath tha tuene thene ena, sa halie se tha werna eta huse, and binna fivwertene nachten te friaiande mith pennigum. $20 (= Rq. $34). Alsa thi rediewa biwernad is, sa ne mot ma naut sena, wara hia skelin thene tichtega to loge brendza. $21 (= Rq. $35). Fon rediena vnredene. Hwersar ret en rediewa ene vnredene ioftha delt enne vndom and tha othere thre thet mith him herde, alsa hi biwernad se, ioftha werna inna warwe beden se and naut vndhenda nelle thes selwa deis, sa geie alrec hira mith achta mercum and mittha huse oppa thene lesta dei, hi nebbene foneskirad thes selwa deis, tha thi other biwernad wart; ne wernat ma naut, sa geie hi allena, ther eret heth. $22 (= Rq. $36). Fon redhim, ther gungath inna others kethene. Hwersar en redieua genth inna otheres redene ioftha kethene ioftha echtene mith wald ioftha raue, and thi othere thet bikeme thria anda warue, sa geie hi mith achta mercum and mith tha huse hi ne iewet a wald, alsa thi other thet thria biclagad hebbe inna warwe; and bikeme hi thet naut, sa geie hi selua. $23 (= Rq. $37). Fon rediena echtene. Alrec redieua se sinre eynere echtene weldech, and enes skel hi achta; acht hi tuia under sinre eynere weld tofara sine sithum and hi vrwnnen werthe mith sine tuam sithum, sa reze hi ene alwe hageste merc tha rediewam and thene scatha felle hi; bitigiath him tha sithar, thet hi mith him estenden hebbe inna ene othere loge and acht hebbe, sa vndvnge hi mith ene ethe; iof hi tuia allenna en thing ech hebbe befta hira bekum, sa vndvnge hi ac. $24 (= Rq. $38). Fon rediena vndome. Thi redieua ne mot sinne dom naut wenda bi achta mercum and bi tha huse, and enis skel hi reda and enis skelre ketha; and hwasa delt enne vnriuchtne dom, sa recht hi tha liudum achta merc, and sin hus berne ma, and of tha ethe altehond. $25 (= Rq. $214). Hwersa tha tuene redieua thene ena vtwarpath, sa riuchte se tha tichtega thes ieris inna there herna; thet hus, ther eberned is, thet wertherie thi redieua, ther vr thet hus hesweren is, and tha erwa ielde thet hus. $26 (= Rq. $39). Fon thera alda rediena domme. Al thetter tha redieua thes erra ieris duath, thet skel stonda, thet ne skelin tha othere naut vnddua; and hwasa telt oppane ende, sin redieua skel thet wita; and al thet ma deth tofara tha redieua, thet skel stonda. $27 (= Rq. $40). Fon rediena pentdege, sa ma went. Hwersa ma thene rediewa went inna sinre herna eta raue, sa ne mot hi naut fiuchta, wara halia sinne nesta sit; went ma se, eyder nimith tuene skillengar; went ma tha othere tuene, alrec tuene skillengar; halath ma tha kocar, him ene halwe hageste merc; halt ma hit to becnum, achta merc tha liudum; bifiuth ma thene redieua ieftha thene hauding, sa felle hit, ther thene redieua went, a tuira wegena, hit se deda ioftha dadel, and to betande thrimne forther. Sprecht hi, thet hine redieua naut ewent nebbe, sa nime thi redieua thet oppa eth and oppa sele, thet hi ewent se, and sa driue hit forth. $28 (= Rq. $41). Fon rediena bifiuchtande. Hwersa ma thene redieua bifiucht, hit se deda ioftha daddele, al set thrimne further; alsaden sa hi innime, sa reke hi alsaden vt. $29 (= Rq. $42). Fon rediena kethinge. Hwersar en redieua ioftha tuene binna burem en thing kethat and hir wndie ma enne mon, sa retze ma tha liudum thria merc and tha redieua ene halue, and to betande thrimne further; and thi frethe skel stonda fon tha thinge to tha thinge bi rediena worde; and sketh ther aeng daddel, sa nime tha redieua ene hageste merc. $30 (= Rq. $43). Fon twam rediem, ther kethat a tuihalua. Hwersa tuene redieua kethat a tuihalua, sa skel ma tia to tha brewe, and hweder kethere sat vnriucht het, sa resze hi tha liudum tuia hageste merc; werther eng sogenath and hir ne se nen thing eketh, hwet sa ther sketh, sa se hit enfaldech. $31 (= Rq. $44). Fon tichtegum binna londe. Hwersa thi tichtega binna londe sketh, sa skel thi redieua reda, ther vr thene tichtega sweren heth; sa skelin thet wita tha thre, ther mith him inna fiardandele send, and tha tuene skelin thene ena vrwinna; werth hi vrwnnen, thet hi vnriuchte ret hebbe, sa retze hi tha liudum achta merc to fretha, and thet hus thera liuda, and thi redieua of tha ethe; werth hi sikerad, thet hi elle riuchte ret hebbe, sa resze thi clagere tha redieuem ene hageste merc. $32 (= Rq. $45a). Fon reddiem, ther ma onsprecht fon tha fretha. Hwersa mar enne redieua onsprecht vmbe enne lessa frethe ieftha vmbe enne marra, alsa fir sat buta daddele se and hit ne se tha redieua naut clagad, sa skel his eleten wesa; ist eclagad, sa skel hi thervmbe geia. $33 (= Rq. $45b) Hwasa let with sine eyne rediewena kethene, sa felle hit and betet a tvira wegena; hir skel ma thene redieua vrwinna, hir skel ma thene hod upsteta inna thisse fiardandele, thes forma deis to bernande and hira hus te stetande; deth him aeng mon engne skatha, sa felle hit and tha liudum achta merc; stet ma ne hod elker ahwerna up, sa resze hi tha liudum achta merc. $34 (= Rq. $46a). Fon re ofledene. Hwersa thi redieua of tha werve gengt and tha ofledene withseith, iof tha fiund thenna aenge case makiath, sa felle thit, ther tha dede deth. $35 (= Rq. $46b). Fon case, ther sketh deis ieftha nachtes. Hwersare sketh en case auder deis ioftha nachtes, sa birede ma se mith tuam witem. Sprecma vmbe ofledene, ther sken is deis ieftha nachtes, sa birede ma se mittha redieua, and nacht and thi dei fon there ofledene se allen; hwet sare sket nachtes ieftha deis et husferem, hit se deda ieftha daddel ieftha lemethe, thet skel wita thi redieua, ther vr thene hana sveren heth, hweder hit inne sken se sa vte. $36 (= Rq. $47) Fon husferim. Hwersa ma ferth mith weldegere hond with sine eyne rediewena kethene to ene huse and hit makie ma inwind and vtwei, sa resze ma tha huswerda to bote ene hageste merc, tha rediewem ene, tha liudum thria; skether eng daddel binna wagum, mith thrim ieldum to ieldande, and thi frethe alsa stor, and thet bonahus thera liuda, and tha botha thribete. Skether aeng raf, sa skel thi redieua thet wita, and efter skel thi huswerda thet biswera; and alsa monege daddel sare skiath, alsa monege frethar te reszande, and tha redieuem alsa monege merc to nimande, and alsa monege hus te bernande. $37 (= Rq. $157) Fon dadlem and fon vndim, ther skiath binna wagum. Vverther en mon enimen binna wagum mith vrwald ieftha vtedriven, vndad ieftha sklain, sa se tha bota thribete, and hine ielde ma mith thrim ieldum; thi frethe and thi brecma se alsaden, alsa hit bi tha huse bereth; vrliust hi clathar ieftha eng thing, and thi redieua alsa rede, sa ielde math mith thrium ieldum; werthat him sine clathar tehauwen ieftha terent, al set thribet, alsa hit berith bi tha clathe; deth hi deda withe bire nede, sa se hia ebete. Istet hus elle hel behalden, and hia vtfolgie oppa thene werf, and hir due ma deda ieftha dadele, and thi redieua thet rede, sa felle monna ek thet hi vrfiuchte, and al se hit enfaldech. $38 (= Rq. $158). Fon golde and fon ferene clatrum. Hwersa mar gold ieftha ferene clathar vrliust anda enre kase, and thi redieua thet rede, sa biswere hi sin eyn; thet gold ielde ma mith golde ieftha mith londe and tha ferena clathar mith pennigum. $39 (= Rq. $48). Fon dura brecma. Hwersa mar ena dura liachtes deis brecht ieftha ofhefth, and thi redieua thet rede, tha haudinge tuene skillingar, mith sex ethum to haliande, and tha redieua tuene, and tha liudum ene merc, and tha dura to makiande. Sketh hit thes nachtes, sa barie mar vmbe; tha secna se en merc; nel ma naut baria, sa mey ma nima sex ether fon tha witherlaga; hefma se of, sa ist alsaden; dempt ma him ne walla, alsa stor; thet andern to betande mith fiuver penningum, and thriv te betande mith redieuena worde. $40 (= Rq. $49a). Fon ofledene. Hwersa mar sprech vmbe ene ofledene binna wagum, sa skel ma there dede vndvnga mith sex ethum, there lemethe mith tuelef ethum, thes daddelis mith fiuver an tuintege ethum; let thi redieua thet on, thet hit binna wagem sken se, sa skel hi thet biswera oppa thene, ther tha dede den heth; fon tha papa and fon tha howe ist alsaden. $41 (= Rq. $49b). Ofledene thes huses went etta dreppele and etta howe, and en mon mey ene husfere dua. $42 (= Rq. $50). Fon hofcase. Hwetsar sketh oppa houwe, thribete to betande; skether eng daddel, thriu ield to reszande, and thi frethe alsa stor, and tha redieua ene merc; skiathar deda ieftha daddel oppa houwe, sa skel thi redieua thet wita, ther vr hine sveren heth, ther thiu dede onkemen is, hueder thiu dede oppa houwe sken se sa naut; thet skel hi thes letera sunnandeis vtketha. $43 (= Rq. $51). There ofledene to vndvngande fon tha houwe alsa ma fon tha huse fon dedum and fon daddelem and fon lemethem, ief thi redieua thet onlet, were thi bete, ther tha dede deth, and sprensze thet hof and lestet bon; fon tha papa and fon tha houwe sa nimath tha liude nenne frethe. $44 (= Rq. $52,53). Fon botum oppa howe and binna skelde. Al tha deda, ther skiath oppa houwe, inna hemme and binna skelde, thribete te betande, wara husbota and thisse benomada bota thi tuednath appenningum and thi thrimenath a were, tha othere bota thi thrimenath a penningum and thi tuednath a were. $45 (= Rq. $54). Fon tha papa. Slaith thi leia thene papa, sa skel thi redieua ne vnder sete driwa buta bresze and butha fretha alsaden ield, sare inare biscopes sone bisened is, and thi biscop nime sine bonnar. $46 (= Rq. $55). Slaith thi papa thene leia, sa driwe thi redieua ne vnder seta, alsa thi Brocmon thene otherne deth buta fretha. $47 (= Rq. $56). Fon skiffene thera redgena. Alsa thi kethere keth fon there mena acht, sa mot mar wel fon skiria and nauvet vmbe hverwa; alsa monege sare vmbe hwerwath, alrec tua merc tha liudum; thet skelin him sine sithar oppa ketha, and alrec vmbehwervere tha sithum ene halwe hageste merc. $48 (= Rq. $57). Fon tha rawe. Hwasa rawath buta rediena orlewe, sa resze hi tha haudinge tuene skillingar and tha redieua tuene and tha liudum ene hageste merc. $49 (= Rq. $58). Hwasa bernt vr wald. Hwet Brocmonna sare ferth mith wald and bernt enne otherne vmbe sinne mon, sa resze hi tha liudum achta merc to fretha, and al thet ma to skatha deth, thet skel thi hauding biswera, and efter skel hit fella binna ene monathe mith golde and mith penningum $50 (= Rq. $59). Fon vrwald: hwasa hoxna hoxnath. Hwasa blend ieftha hoxnath enne mon mith wald and mith bisette hei, sa bete ma him thribete and achta merc to fretha, and thet hus thera liuda. $51 (= Rq. $60). Hwasa otherne went et fenne and forda. Hwasa otherne went et fenne and et forda ieftha inna sin lond genth, meth ieftha skereth ieftha ereth ieftha delfth, and hi werthe vrwnnen mith rediena dome and mith tvam witem, sa resze hi tha redieua tuene skillengar and tha clagere tuene and tha liudem ene merc; neth hi nene werde, sa vndvnge ma mith sex ethum; ferth hi mith wald and mith wepnadere hond buta rediena dome and nimth skettar, alsa stor; skether aeng dadel, achta merc tha liudum, and tha daddel se buta fretha; nimth ma ene monne en quik inna sine londe, and hit nime ma him et mith wald, thi redieua nimth tuene skillingar, and him tuene, and thene skatha to betande bi rediena worde, ief hit biret; biret hit nauwet, sa vndvnge ma mith ene ethe. $52 (= Rq. $61). Fon tham, ther ofkerfth are ieftha stert. Hwasa ferth to otheres fenne and to otheres forda and kerfth of otheres quike are ieftha stert, sa nime hi thet quik, ther ne scatha den heth, and ieldet thrimne further bi rediena worde; thi redieua nime tuene skillingar, and tha liudem ene hageste merc to fretha; binna wagum alsa stor; ief thi redieua thet onlet, sa biwerie thi hauding thet mith tuelef ethum. $53 (= Rq. $62). Fon dadele et vrmethe. Skether en dadel et vrmethe and et vrdelfta, et vrskerande, et vrsketrawe and et othere rawe oppa londe, achta merc tha liudum, thi ther tha wald drifth, and tha dadele buta fretha; and monnec felle thet, ther hi vrfuchten hebbe buta wagem and buta houwe, hi ne tye oppa ene ofledene; and thi wachtiere, ther ma se oppa brensze, ief thi redieua thet biret, ther vr thene hana sveren heth; alsaden set fon alreckere wald and fon alrecke tichtega. $54 (= Rq. $63). Fonre soldede. Hwersa en mon werth bifuchten and hi clagie ene soldede, and thi redieua thet rede, and hi sterwe binna thrim wikem, sa ielde ma hine mith ene fulle ielde; liwath hi ther vr, sa vndvnge ma mith tuelef ethum. $55 (= Rq. $64). Fon case. Hwersar sketh en case, and hir sle ma to eyder sida enne mon, sa felle thine frethe, ther tha case halad heth. $56 (= Rq. $65). Fon tha brocgerdelle. Hwasa othrum thene brocgerdel brech, sa ne meire helpa nanene monne; sa resze ma him to bote tuene skillingar and tha redieua tuene. $57 (= Rq. $66). Fonre weywendene. Thiu weywendene, ther fon kemen send wedlingar, blodelsa, rendar ieftha raf, ief se tha redieua clagad send, and hir withseke ma, sa berede ma se mith tuam witem; sa resze mar vmbe to bote tuene skillingar, and tha deda to betande, and tha redieua tuene; nister naut to auwande, sa vndvnge ma mith ethum; fon there nacht set alsaden. $58 (= Rq. $67). Fon mentel and fon tha stacke, ther ma rent. Hwersa mar rent mentel ieftha stac, and hit ne se naut flocskiwech, sa is thi pelin and thiu sponne se penningar; ist flocskiwech, thre penningar; nestla breszen, en hagest skilling; kneppet, sex penningar and en to betande; nene rendar te betande inna linnene clathum, alsa fir sa hit bihalden se; sensze naut bihaldin, hir bete ma bi rediena worde. $59 (= Rq. $68a). Fon case et warste and et hlothe. Hwetsar sketh et warste and et hlothe binna wagem, en ield and enne frethe. $60 (= Rq. $68b). Hwersar en mon inglupth ieftha inrent ieftha instet, thriu ield and thre frethar; fald hit to dadele, thet hus thera liuda, ief thi redieua thet ret; fald hit to dedum, thribete to betande, and thet hus naute bernande; tha liudum thria merc, and tha redieuem ene, and tha huswerda ene, hit se deda ieftha daddel; and en mon mei tha husfera dua. $61 (= Rq. $69). Al thet ther sken is, er ma tha kera bikas and thet bref skref, thet skel lidsza; al thetter efter sketh, thet skel ma riuchta bi tha brewe. $62 (= Rq. $70). Fon rawe. Hwasa deth en skacraf, and thi redieua thet birede, ther vr thene hana sweren heth, sa bete ma him thrimne further, and sin raf bisuere hi, and sa nime thi hana thre skillingar and thi redieua thre and tha liudem tva hagesta merc; and ne mei hit nawet fella, sa stonde hit oppa sinne hals. $63 (= Rq. $71). Fonre wik. Hwetsar sketh inare wik et fivwer howem, et sente Maria howe, et Vtengra howe, et Victoris howe, et Aurec howe, etter missa inare wik, tha bota al thribete and tha dadele mith thrim ieldum to ieldande and thre frethar tha liudem and tha redieuem alsa monege brecma; and ne helpath tha tuene redieua tha hana nauuet, er hia of there wik vnge, sa geie hia tuene eider mith fiuwer hageste mercum; hueder sat halt ac helpe him sines riuchtes and hi clagie thenna enda herskipe, sa geie hi mith fiwer hageste mercum, and thene tichtega vpriuchte hi. $64 (= Rq. $72,73). Fon hofcase. Hofcase and rediena case and wifcase and husfera indere wic ettere missa al ena: al se hit thrimne further; vrliust mar clathar ieftha engra honda quic ettere missa indere wic etta fiuwer houwem, mith thrim ieldum to ieldande, ief thi redieua thet onlet. Ist comp, sa set alsaden and naute diurra. $65 (= Rq. $74,75). Alle comp inare wic ettere missa se en merc tha secna and naut lessa; and skether eng brond inare wic ettere missa fon enre iechtegere case and thi redieua thet onlet, sa ielde mane mith thrim ieldum, and thet ingod beswere thi hana and wite selwa thene hauding; tha rediewm ene merc and tha liudum achta; and ret thi redieua thet nauuet on, and mar vmbe baria welle, sa stonde hit to othere barem. $66 (= Rq. $76). Fon tha vtlendesca riuchtere. Hwasa thene vtlendesca riuchtere, hweder sat is thi suthera sa thi northera, binna londe onsprech vmbe ene redene, sa skelin tha tuene bi tha ena stonda, hweder hi riuchte rede sa nawet, and thiu mene acht skel tha tuene driua to tha ena bi fiuwer hageste mercum, thet hia spreke ge ieftha na mith tha ena, alrec hira mith sex ethum; and stonde hia nawet mith him, sa resze hi fiuwer hagesta merc tha liudum, and thene tichtega vpriuchte hi. $67 (= Rq. $77). Alrec mon se sines eynes londes and sines ethes weldech, and ne meire thene eth nawet waria, sa mot hine resza vnder sine eine rediena dele and nawet buta tha dele bi fiwer hagesta mercum, and invr sine wagar nimere hwene sa hi welle, and wardie selwa enre fulfenszere hond; and nis hi nawet fulfensze and werthe vrvnnen mith ene vndome, sa felle hi thet selwa. $68 (= Rq. $78). Fon londsziwa. Hwersa tuene men sziwiath vmbe en lond and sprecath bethe federerwe, and hira ne biade nauder suethene werde, ieftha hia biade bethe suethena werde, sa ist comp; biut thi other suethena werde and thi other nene, sa skel ma tha werde leda inna tha londe, ther thiu sziwe on is, ieftha inna tha londe, ther a tuihalwa slatem send; thet is suethena werde. $69 (= Rq. $79) Hwersa ma sziwath vmbe londcap, sa wite thi redieuat, hweder cap wesen hebbe sa nauwet; and thi redieua skel thet wita, ther sin berielda sprech, thetter cap den se. $70 (= Rq. $80) Thene kestere and thene londdriwere ne mey ma nawet rueka vmbe tha sibbe ieftha vmbe tha blatnese. $71 (= Rq. $81). Fon lond echtande. Hwasa welle echta lond, sa wise hit fensze buta there herthstede; skel ma echta tha herthstede, sa dele thi, ther mat echta skel, and thi other kiase. $72 (= Rq. $82). Fon londwixle. Londwixle, ther beseten is ier and dei, and ma hit vnddua welle, thet skel ma halda mith tha londdriwere and mith tuam triuwe witem; nist naut biseten ier and dei, sa vndvnge mar mith sex ethum, hit ne se, thet hit tofara rediem den se. $73 (= Rq. $83). Londwixle mei ma vnddua vnder sibbe mith nyarwixle inna tha londe, theret erest on erath is, ieftha ina tha londe, ther a tuihalwa slates send, ewenpende bi rediena worde. $74 (= Rq. $84,85). Fon londfenene. Londfenene mey ma to loge brensza mitha kestere and mith tuam witem buta rediena redene; londcap ne mey ma nawet ma sa enes withsedsza. $75 (= Rq. $86). Fon londcape. Hwasa heth en lond capad and vrgulden and fagad ieftha to here seld, and en other thet thenna withsedsze, ther alsa sib se, a hebbe hit, theret capad heth. $76 (= Rq. $87). Fon lond delande. Hwasa welle lond dela, hit se lessa ieftha marra, sa dele thi, ther fon welle, and thi other kiase, and thene slat makia ma of eider londe bi thrim ierdfotem. $77 (= Rq. $88). Fon wer delande, ther biset is mitha huse. Hwasa heth enne sexta del fon ene werwe ieftha binna, and mitha huse beset se, sa skel thi werf allegadder to riuchte dele hwerua. Ist vr thene sexta del, sa beliwe thet hus vnberepped, and thi redieua wise thene lessa del forth buta huse bi like werthe. $78 (= Rq. $89). Fon londhwerve. Hwasa welle mith sine londe hwerra, sa biade hit vr sine eine burar, hia se lessa ieftha marra, and thi nimet, ther vrkniaia muge binna sogen nachtum ac hwana sat ekemen se; nimth hit, sa skelret him vrielda, thene haldel binna fiuwertene nachtem and thene halfdel binna ene monde; deth hi thet naut, sa ist alle liudum fri; sziwe hia vmbe thet werth, sa biwerie hi thet, ther thet lond ach, a sex penningar mith ene ethe, thet hit alsa biwertherad hebbe. $79 (= Rq. $90a). Fon boldbrenge. Sa ne moter nanen mon sinre wiwe blodbreng sella, hi ne se bierwed. $80 (= Rq. $90b). Fon thes vnierega bernes erwe. Sa ne moter nauder feder ni moder, suster ni brother ieftha nanen mon thes vnierega bernes erwe sella ieftha vtsetta, hine driwe therto hunger ieftha nedbrond, segong and breszene dikar, sa skel ma thet dua mith holdena rede. $81 (= Rq. $91). Fon alderlasa gode. Hwasa nimth thes alderlasa god, hit se lessa ieftha marra, thet skel hi to loge brensza mith mene holdem. $82 (= Rq. $92). Thes alderlasa god, hit se lessa ieftha marra, deled ieftha vnedeled, thet skel ma to loge brensza mith mene holdem alsaden, sat feder and moder him lewed hebbath, and thes alderlasa god thet ne mei nauder uaxa ni wonia alsa thet wiwegod. $83 (= Rq. $93). Fon alderlasa erwa. Hwersar is en alderlas erwa and hi hebbe alsa stor hewena, thet hi muge knapa and founa vndhalda, sa sette ma him thene to, ther him alra sibbest se; thet skel hi behuda and efter withe to wariande mith fiuwer holdena rede, alsa hit ierich his, hit ne se, thet him becume hunger ieftha nedbrond, heregong ieftha segong and breszene dikar. $84 (= Rq. $94). Fon alderlasa erwa. Hwersar is en erwa and hi ne muge knapa ieftha founa nawet vndhalda, sa nime ma al thet ma driwa and drega muge, thet resze ma tha nesta; thet skel hi mith londe bisetta, thet hit bihalden se, alsa naka sa thi erwa ierech se; thes skelin walda tha fedirfriund and thi, ther thera lawena wenech se. $85 (= Rq. $95). Hwersare ferth en alderlas erwa fon tha werandstewe, and him bitygie ma goldes ieftha clatha ieftha fias, vmbe thet gold and vmbe tha clathar wite thi redieuat, and thes fias vndvnge ma mith ethum. $86 (= Rq. $96). Sa skelin alla frowa a foremunde stonda. Sa skelin alla frouwa a foremunde stonda: hia skelin hebba auder thene berena ief thene kerena, and thi skel foremundere wesa, ther alra sibbest is; send hia allike sib, sa is thiu federside weldegera; and there wiwe god ne skel nauder waxa ni wonia. $87 (= Rq. $97). Fon notem. Hwersar en frowe sterfth and hiu ne lewe nenne erwa, sa skel ma tha nota talia alsa hit bereth fon sumeresnach. $88 (= Rq. $98). Fon tha warandstewe. Hwersar is en mon ieftha wif alsa lef, thetter hine selwa ne muge nawet biriuchta, and thi redieua thet rede, sa skel hi hebba thene warandstef, ther thera lawena wenech is. $89 (= Rq $99). Fon skeldum. Hwersa tha hewa fallath a lawa, sa ielde ma tha skelda bifara alle thingum. $90 (= Rq. $100). Fon lenpenningum. Sprecma vmbe lenpenningar, and thi other spreke: "ic nebbe with thi nen duande", sa birede ma se mith tuam witem and mitha kestere. Sprech hi: "vndhent and witheracht", sa birede ma hit mith alsadenre werde. $91 (= Rq. $101) Fon alderlasa gode. Hwersar is en alderlas erwa and hi se mitha werandstewe and thet god se naut edeled, sprech ther aeng mon fon there federsida ieftha fon there modersida binna tha thredda, and hia clagie fore thene alderlasa erwa, sa skel thi, ther tha lawa heth, en riuth del dela witthene alderlasa erwa. $92 (= Rq. $102). Fon drenfia. Hwersar en wide monnath and hire bren bitigie hire dernfias, sa vndvnge hius mitha fiaethe; sprech thi suiaring ieftha brother ieftha en other mon buta tha hiscthe, sa skel ma mith compe halia thet fia; ist driwant and dregant god and hit witlic se, sa skel thi redieua thet withedriwa. $93 (= Rq. $103). Fon tha monne, ther blind is. Hwersare monne ieftha wiwe sin ieftha sivne werth birawad, sa dele tha erwa tha hewa and hia tie hine, alsa hit bere bi tha reke. $94 (= Rq. $104). Thi feder waldes wether sine bernum reke. Thi feder waldes, hwetter sine bernem reke, alsa longe sa hi elte and sund is; and senter thre sundre ieftha mongera, and thi ena se mith tha federe, and alsa thi feder sterfth, sa dele hia tha federlawa; senter rikenga, sa nime alrec hira alsa stor sa him bereth fon sine hewem; and nanen fulbrother vrfe thene otherne anda dele, hit ne se, thet him sin age binimen se, ieftha lamed se ieftha bunden hebbe wesen, sa nime hi thet a faradele of. $95 (= Rq. $105). Fon nedkestum. Alla nedkesta skel ma mith compe besla, hit ne se, thet hi alsa blat se, thet hi kampa naut ne muge, and him nen holda tofarastonda nelle, sa skel hi vnga to tha szetele. Is hiu alsa blat, thet hiu kempa nauwet ne muge, and hire nen holda tofarastonda nelle, sa lede hi sex men of sine kenne, and efter suere hi mith fiuwer and tuintege ethum, thet hi elle siker se. $96 (= Rq. $106). Fon vrwald. Hwersa ma nimth ene frouwa mith wald and mith vnwilla and breit hia invr dura and invr dreppel, and hiu thet birhope, and tha rediewa hia mith dome withedriwe, sa skel ma hire resza en tuede szeremonnes ield and tha liudem half alsa stor and tha rediem tuene skillengar; kemth hiu thet alra hageste, sa skel hiu thet biweria mith fiuwer and tuintege ethum, and sa skel ma hia ielda mith ene szeremonnes ielde, and thet hus thera liuda, and tha rediem ene hageste merc; ac ist comp, sa huile thet hus, and hire en szeremonnis ield, and thi frethe half alsa stor; szetel and comp allen etta nedmonda. $97 (= Rq. $107). Fon meke. Hwersa ma ene founa of tha werem iefth ieftha spont, and hia makie ma mitha faderem vnierech, sa resze ma hire to bote en tuede szeremonnis ield and tha liudem half alsa stor and tha rediem ene merc. Ist en wilmec, and ma sziwe vmbe thene blodbreng, sa skeppe thi redieua thene mekere, and therefter winne ma thene boldbreng mitha mekere and mith tuam triuwe monnum ieftha wiwem, and thi redieua thet rede vmbe thet mec. Thi thredda mot spreca fore thene alderlasa, fon eyder sida binna thredda. $98 (= Rq $108). Fon skechmeke. Hwersar en foune sketh, sa skeppe thet feder and brother, hu stor hia hire to boldbrenge resze. $99 (= Rq. $109a). Fon inlegum there wiwe. Hwersar en wif fon tha grewe ingenth, sa skel hiu inlidsza thene fiarda penning alle hires godes buta lawem; ferth hiu fon tha grewe vta werem, sa ne mei se mith nanene thinge withecuma; ac bitigath ma hire drenfias, sa suere hiu ene fiaeth oppa tha dreppele; deth hiu en iechtech raf, sa skel thi redieua thet withedriwa. $100 (= Rq. $109b). Fon tuam tamum. Hwersar send tuene tamar, brother and sustere, sum tie and sum naut, sa dele tha brotherbern with hira halffederia tha lawa. $101 (= Rq. $110). Fon lawem Hwersar en moder tiuch tuene sunar, and thi other werthe slain, sa nimth hiu hires bernes ield; alsa hiu sterfth, sa fath fulsusterne mith fulre hond on, and tha halfsusterne mith halwere hond on, and thet ield skel bihalden wesa; ac is hiu alsa blat, thet hiu se elker ne muge nauvet hatia, sa nime hiu of tha ielde bi hire presteres hliene and thes redieua ethe, thet hiu tha skerpa hungere were. $102 (= Rq. $111). Fon lawim. Hwersar en moder tiuch enne sune, and hi werthe slain and hebbe en kind tein and hit sterwe and sin god hwerre a lawa, sa nimth hiu of tha lawem hire bernis ield mitha aldafedere; fon tha federe and fon there aldamodere ist allen. $103 (= Rq $112). Fon khinda lawim. Hwersar en frowe monnath and tiuch en kind, and hia sterwe bethe, sa skelin brothere and susterne allic anda lawa fa, and thiu moder huile; bernisbern is tuiia bern and lefth sine aldafedere. $104 (= Rq. $113). Ief hir enre wiwe werth hire mon slain, and hiu hebbe bern etein and fare ina enne otherne liudgarda, sa vtie ma hire tha fletiewa buta ielde, ief se ther send; nister nawet, sa hebbe hiu thene scatha. $105 (= Rq. $114). Skel ma vtia tha fletiewa, sa winne ma se inna tha londe, ther se on vndhent send, jeftha inna tha othere londe jeftha ina tha thredda; ne wint ma se nawet, sa suere hi tuene ethar fore thet deimth, thet hit nawet awinna ne muge; sa lidse hi forth en fulfensze lond, and thi redieua skelt echta, theret innima skel bi like pende; sziwege hia, sa winne hiut mith tuam friundem ane skilling mith ene ethe. $106 (= Rq. $115). Fonre erwemegthe. Fon there erwemeithe mei ma enis nima the besetta meide, thet is en skilling fore tha sex merc, and naut ma; and hweder sa feder sa moder liwath, sa ne thur ma vr tha hewa nenawet resza. $107 (= Rq. $116). Fon tuam tamum. Hwersar en wif tiuch tuene tamar, alsa hiu sterfth, sa skel ma tha hewa dela efter tha kni: thi brother nimth enne hap, and tha tua sustera enne; thi fulbrother nimth there fulsustere hap ina tha lawem. $108 (= Rq. $117). Hwersar is en brother and belde sina sustra vnlike vt and hi sterwe and ne lewe nenne erwa, sa makie ma tha boldbrengar lic of tha lawem, ief se ther send; senszer nauwet, sa sitte monnec oppa tham, ther hi heth. $109 (= Rq. $118). Fon boldbrenge. Alder tuene brothere ene sustere vtbelde and thi othere sterwe, sa lefth hit sine brothere, and thiu suster ne deth nenne becfeng; thi fulbrother nimth there fulsustere hap ina tha lawem. $110 (= Rq. $119). Fon tha bernlasa federia. Hwersar is en bernlas federia and hi ne lewe nauder feder ni moder, suster ni brother, sa fath newa and nifta allike anda lawa. $111 (= Rq. $120). Fon lawem. Edeles lawa and aldafederes lawa and aldamoders lawa, tha skelin nima bernisbern and kindiskind, tha ne mei ma vter thissa honda nauwet wenda. $112 (= Rq. $121). Ac wellath Brocmon thet, thet thi tha lawa nime, ther se vrkniaia muge fon eyder sida; bernlasa fethalawa tha skelin in alder se vt komen; werthath tha wagar biwepen, sa fath to newa and nifta allike. $113 (= Rq. $122,123). Fon tha thingathe. Thet wellath Brocmen, thet tha fiuwer rediewa gadervnge ina fiardandele er tha thriuchthingathe and endegie alle tichtega; alle thet, ther tha fiuwer nawet ne endegie, thet endegie thiu mene acht eta thruchthingathe; kemth ther aeng mon efter alle Brocmonna londe eta fiardendeles ende, thet him nauwet hulpen se, and nelle ieta nauwet helpa, sa kemere thet eta other thinge and eta thredda; and him nerthe thenna naut ehulpen, sa geie alrec hira mith tuam mercum, hi nebbene fonneskirad; and fon eydere thruchthingathe set alsaden. $114 (= Rq. $124). Fon tha thruchthingathe. Hwasa thene thruchthingath let, sa resze hi tha liudem tua merc and tha sithum ene halwe; thi, ther tha kethene nauwet ne halt, alsa stor; and thene thruchthingath skel ma halda tuiia anda iera; halt mane to becnum, sa resze hi fiuwer merc; fiucht mar engne scatha, sa felle hit a tuira wegena. $115 (= Rq. $125). Fon scrift. Sa skel ma scriwa tuiia anda iera, vmbe sente Michel and vmbe sente Pederesdei, eta mena loge. $116 (= Rq. $126). Hwersa mar enne mon inthinsza skel mith sine redieua inna enne otherne fiardandel, sa skel sin rediewa thet spreca vr tha mena acht, and sa se hi vnder thingfretha. $117 (= Rq. $127). Fon case tuisca fiardandelem. Hwersar sketh en case tuisca fiardandelem, and hir sle ma to eider sida enne mon, sa resze hi thene frethe, ther tha case halad heth; sziwie tha redia vmbe tha halinga a tuihalwa, and eider stonde mith sine monne, sa skethe thet thiu mene acht; and endegie set nawet, sa geie alrec hira mith achta mercum, and en mey tha skiffene winna; and hweder thira tuira rediena sa thet vnriucht heth, sa resze hi tha liudem achta merc, and sin hus berne ma, and altohond of tha ethe; and sketh hit binna fiardandele, and eyder stonde mith sinem, sa se hit alsaden. $118 (= Rq. $128). Hwerther en mon slain inare scule. Vverther en mon slain ieftha vndad inna scule ieftha ina sketskiala ieftha inare bere, thrimne further al thetter sketh, ief the redieua thet onlet. $119 (= Rq. $129). Hwasa thene vthemeda husat. Hwasa thene vthemeda husath ieftha howath ieftha oppa sinne werf set, sa skel hi thes wachtia, hwetsa hi deth. $120 (= Rq. $130). Fon tha vrthingada monne. Hwasa thene vrthingada mon oppa sinne werf set, husath ieftha howath, alder ma hine vmbe onsprech, thes wachtie hi, hi ne vrdriwene; innath thi londseta thene vrthingada, sa felle hine skatha selwa. $121 (= Rq. $131). Fon halsfriainge. Hwasa ene monne sinne hals friath, and werth hi aslain, sa nime hi thet ield, theret vteracht heth, hit se thi sibbe ieftha thi fremeda. $122 (= Rq. $132). Hir ne skel nen freta wesa tuisca londum; falt thi tichtega oppa thene freta, sa felle tha holda therfore. $123 (= Rq. $133). Sa ist alra Brocmonna kere, thet ma nene freta ne mote thene liudafrethe vriewa; mey hit fella, sa nime tha talemen thene frethe; ac nime hiane naut, sa resze hiane selwa, and hia muge fella; and neth thi freta nena hewa, sa stonde hit oppa sinne hals; and hir ne mot ma nanene monne thene hals vrthingia, alsa fir sare felle muge. $124 (= Rq. $134). Fon bare, alsa ma tha kempa vtlath. Thet wellath Brocmen, thet ma thria barie; skel ma kempa, sa skel ma tuiia kempa anda iera, a sunnaewenda bifara sente Maria letera dei and a sunnaewenda bifara sente Liudgerisdei, and achta degem er tha secna to makiande and efter strid to suerande; send tha secna en half merc, sa skel ma onsuera; ist marra, sa skel ma kempa; alra monnek mot baria, hwenese hi wel, and nen vnierich bern mot ma baria. $125 (= Rq. $135a). Fon barim vnder sibbe. Hwersar lidsze daddel ieftha lemethe, sa ne mot ma vnder tha forma nauwet baria fon eyder sida, hit ne se, thet him alle sine ara ofberned se, sa ne mey ma thet mith nanene dadele aientia. $126 (= Rq. $135b). Fon ienbarim, ther ma deth fon sibbim. Thi redieua skeppe sines haudingis secna; tiuch ma oppa ene ienbare vmbe sibbe and ma sziwe, sa skeppe thet mithe him thi rediewa, ther him alra nest is; sziwe hia tuene vmbe tha sibbe, sa skethe thet thiu mene acht, and hweder sa thet vnriucht heth, sa skel hi ene halwe merc resza tha rediewem. $127 (= Rq. $136). Fon barim fon tuam sennem. Barath ma tua sennene ieftha hira other, sa skelin hia al en hond wesa, hit se bare ieftha ienbare inna hira tuira kenne. $128 (= Rq. $137). Fon barim, ther ma nawet fella ne muge. Hwersare send ene bare, and hi ne muget nawet fella, sa stonde hit oppa sinne hals; sprecath tha haudingar oppa ene sone, ther den se tofara tha rediewa, sa halde ma se; and halt hi tha sone nawet, ther ma onsprech, sa stonde hit oppa sinne hals; and duath hia tha sone befta rediena bekem, sa set enre pennigskelde lic. $129 (= Rq. $138). Fon barim inna otherne fiardandel. Hwasa welle baria inna enne otherne fiardandel ieftha inna ene othere burar, sa barie hi eta mena loge, and hwasa barie binna burem, sa barie hi vpper sine redieuem. $130 (= Rq. $139). Alsa mane thiaf barath. Barath ma enne thiaf, ther fella nauwet ne muge, sa skel ma hine thriia baria, and efter skel hit stonda al to tha dei, ther tha redieua alle bare endigie; nel hi thenna nawet to riuchte stonda, sa stonde hit oppa sinne hals. $131 (= Rq. $140a). Fon tha thiawe, ther ma feth. Hwersa mar en thiaf feth, sa skel ma hine brensza a liudawarf; him skelin fiuwer redia vrdela sinne hals, ief hia vmbben mugen wertha; nis thet nawet, sa skel ma hine brensza a bredra warf, and tha redia ne moten nawet vnga leta, hwara tha liude skelin thervmbe skiffa. $132 (= Rq $140b). Hwasa en thiaf feth. Thi, therne thiaf feth, alsa stor, sa hi sines godes onfeth, thet nime hi, and naut ma; of tha thiawes gode nime tha rediewa ene merc, and tha liudem thet other, and sa vrdue hine selwa. $133 (= Rq. $141) Fon thiufthum, alsa ma enne thiaf feth. Hwersa mar enne thiaf feth and hine leta ma vnga, and hi werthe vrwnnen mith rediena dome and mith londriuchte, sa resze hi to fretha en tuede ield. $134 (= Rq. $142). Fon tha forma bende. Hwersa mar enne mon nimth binna pisle and binna piseldreple and hine tie vr tuene dreplar and halde hine vr enne fenszena, sa resze ma him to bote vmbe thene inra dreppel achta skillengar and vmbe thene vttra fiuwer, and tha huswerda ene merc, and tha rediem ene, and liudem thria. $135 (= Rq. $143). Fonre hagesta bende. Thit is thiu hageste bende: alsa mar enne mon nimth and bint him sina honda oppa sinne bec, and hi ne se nimen et hole ne et herna, and him ne nime ma nanen thing a beke ieftha bosme, and hi werthe to sikera deled, sa resze ma him to bote en tuede ield and tha liudem enne tueden frethe and tha rediem fiuwer skillengar. $136 (= Rq. $144). Thiu midleste bende. Thiu midleste bende ist thet: alsa mar enne mon nimth and werpt hine a heft and a helda, sa resze ma him to bote ene halwe merc and tha liudem ene merc and tha rediem thre skillengar. $137 (= Rq. $145). Thiu lereste bende. Thiu lereste bende is thet: hwersa mar enne mon a fretha inlet and halt hine vr enne fenszena, sa resze ma him to bote tuene skillengar and tha rediem tuene and tha liudem sex. $138 (= Rq. $146). Fon tha bronde, hwasa othrum crocha brang. Hwasa otherem thes betigath, thetter him crocha brocht hebbe, sa skel ma hit kema thriia fon tha helga altare and biada thet riucht; and efter barie hi thriia and alsa nime hine a sine wald achta degar and haldene mith nethum, and hi vnge to tha szetele; senta secna en merc and hit vrliase, sa felle hit mith tuam mercum, ief hit fella mei, and tha liudem ene halwe merc; nis thet naut, sa stonde hit oppa sinne hals; wellath holda therfore kempa, and hit vrliase, sa resze hia tua merc and tha liudem ene. $139 (= Rq. $147). Fon tha bernere. Hwerther en mon bifen mith colege crocha and mith rhumegre hond, sa skel ma hine setta oppa enne tianspesze fial and oppa enne northhaldne bam. $140 (= Rq. $148). Fon wald inna kempena hemme. Hwasa deth ene wald and binime tha kempa thet strid inna tha hemme, sa skel hi vpriuchta tha secna and tha liudum to reszande thritech merca, and thet hus thera liuda wald; skether eng dadel, thriu ield to reszande, and thi frethe alsa stor, and tha deda thribete; thet skel wita thi redia, ther vr hine sueren heth; and thi redia skel thene hod vpsteta; deth hi thet nawet, sa resze hi tha liudem achta merc; and alsa skel hi dua eta hoffretha and eta husfretha; mei ma hit berna ieftha breka et sunnaskine, sa due ma hit; nistet nawet, sa stonde hit al thene letera dei elle hel; brecma hit, sa resze ma tha liudem achta merc. $141 (= Rq. $149). Fon tha thruchthingathe. Etta thruchthingathe ne mot ma nanenne mon baria and nene werde leda, efter tham ther thi tichtega thingad is. $142 (= Rq. $150) Fon tivge: hwa tivga mote and hwa naut. Sa ne moter nanen vnierich bren tivga, and hir ne mot nanen mon tivga, hi nebbe lond; and vmbe epene dadelis seca ne moter vnder tha forma nen mon tivga; thi fiarda and thi othera mot eider tivga fore thene otherne; thi brother ne mot nawet tivga fore thene otherne; thiu snore and thi swiaring and thi athum mot alrec tivga fore thene otherne. $143 (= Rq. $151). Fon feste and fon trivwem. Hwasa othrum bitigath festis ieftha triuwena, sa vndvnge ma mith tuelef ethum, hit ne se, thet ma gold hebbe; sa sitte ma alder oppa, and there entele vndvnge ma. $144 (= Rq. $152). Fon bronde and fon thiufte fon barim. Hwersar en brond sketh ieftha en thiufte, sa skel ma hit thriia askia fon tha helga altare; efter skel mar vmbe bonna ieftha baria ieftha gabbia and naut ne mot ma bethe dua; thet skel thi redia wita, ther vr thene hana sueren heth, hweder vmbe kemped se sa gabbad sa bonned se sa naut. $145 (= Rq. $153). Fon bronde, alsa hi bernt fon owene ieftha thera. Hwersa thi mon bernt fon owene ieftha fon herthe ieftha fon thera, and him bitigie ma, thet hi binna wagum hebbe clathar hewed ieftha gold ieftha aeng thing, sa ne thur hi ther mith nanene onszere aienstonda, bihalwa tham alena, ther beden is ieftha lened; sprech hi: "naut vndhent", sa birede hit mith tuam witem; sprech hi: "witheracht", sa due hi thet riucht. $146 (= Rq. $154a). Fon bronde, therfon fule husa bernt. Hwersa ma thene brond onstet and hir berne fon fule husa, sa skeppe thi tha bare, ther him thi brond alra erest onstet is, and efter stonde hia te hape mith coste and mith compe ney tha secnum, ther him emakad send, and en kempa skel hit bisla. $147 (= Rq. $154b). Fon bronde, therfon fule husa bernd. Hwersa sketh en brond, and hir berne fon phe husa ioftha fule husa, wel thi forma baria, sa barie hi; nel hi naut baria, sa barie hwasa welle; skether eng dadil, sa barie mar vmbe thet dadil, hit ne se, thet thi baria welle, ther hit inne sken is; sa stonde thiu merc bire otherre. $148 (= Rq. $155). Fon thiuftim, ther burcuth is. Hwersa ene monne stelin werth, and hit se burcuth, and him bitigie ma, thet hi enis otheres god a sinre helde hewed hebbe, thet nimth hi naut ferra plicht sa sin eyn; ief ma thet spreka welle, thet him naut estelin se, sa swere hi a forene skilling enne eth. $149 (= Rq. $156). Fon tha mena mentre, ther ma nimth. Hwersa ma nimth tha mena mentre fad ieftha falxsc gold inna sinre hond ieftha sinre wald ieftha sinre smitha, sa skel hi tha ferna mittha halse fella. Sprecman on, thet hi fad ieftha falxke penningar ekeren hebbe, sa vndvngere and swere a forene skilling enne eth. $150 (= Rq. $159a). Fon burgem, hulede hia wesa skelin. Brocmen kiasath thet to enre kere, thet ther nena burga and nena mura and nene hage stenhus ni mote wesa bi achta mercum; and hoc redia sa thit naut ne keth and efter naut te dele ne leyth, sa geie hi mith achta mercum and mith sine huse witha liude, hi ne skiriene fon. Hwerther aeng stenhus hagra rvocht sa tuelf ierdfota hach andre thivcke and szelner vr tua feke andre thiuchke, sa geie mith achta mercum thi, thert ach; and nye redia skelin hit onfa, efter tham ther tha erra redia thene frethe vtkethat, bi alsadenre geie. $151 (= Rq. $159b). Fon gabbath. Hwasa anne gabbat innat lond lat iowa of tha londe, sa retze hi tvintich merca inna alrecne fiardandel; and alsa monege sare gabiat, alsa monege tvintich merca tha liudem and tha rediem bi tha mercum and tha talemonnum bi tha mercum; thit kethe thi redia, ther vr thi sveren is, alevna tha othre frethum bi achta mercum and bi tha huse. $152 (= Rq. $160). Hwasa enne mon oppa sinne werf set. Hwasa enne mon oppa sinne werf set, sa moterne er Waldburgedei naut vrdriwa; wel hine vrdriwa, sa skel hine er sente Iohannisdei vrdriwa; sit hi thervr, sa ne meyre hine naut vrdriwa. Sprecma vmbe en ierim, sa skel thi, therne werf ach, mith tuelef ethum vndvnga; fon tha londe ist alsaden, buta Aurikera geste londe, thet tilath ma thriu ier efter tha dunge, hit ne se, thet mat sella skele ieftha wixlia. Thit ered and esen heth, thi nimene fech thes ieres, and thi, ther thet lond ekapad heth ieftha wixlad, thi nime tha hera, and alsaden set fon alrecke londe, sa mar mithe hwerft. $153 (= Rq. $161). Alle werrar mot ma leia eweneker. Alle weruar mot ma leia eweneker al to tha riuchta tia; delfma diapera, sa resze ma tha liudem ene merc and tha redievm tuene skillingar and tha clagere tuene, and withe te makiande alsaden, sat er was; and thet driwe thi redia forth bi achta mercum. $154 (= Rq. $162). Fon tha sile. Thi ther welle enne sil ledsa bi tha haga werue, thi vrtie thre fet. $155 (= Rq. $163). Fon tha slate. Thi ther enne epene slat leith, thi vrtie sex fet inna lega; and alle silar and alle alde slatar and alle tentra and alle weinfera and fenszen lond, and sex ier biseten se and thi redia alsa rede, ther vr sveren is, sa halde ma se mith ethum, and hit mith holte and mith pelem biset se. $156 (= Rq. $164). Fon bigewene gode. Thet godeshuses god and alle biiewennera liuda god, thet skel ma halda mith ene papa and mith tuam helgenamonnum, ther thenna tosueren send. $157 (= Rq. $165). Fonre weinfere. Hwersar is en weinfere biseten and bineten, hiu se hagera ieftha legera, and hir welle ma enne slat makia, sa skel ma vrtia thre fet; set mar enne tenter, sa halde ma thene riuchta tia. $158 (= Rq. $166). Fon pelem ieftha tentrum. Hwasa torothat pelar ieftha tentrar and thi redia thet rede, sa resze hi tha redia tuene skillingar and sine witherlaga tuene and tha liudem ene merc; nel thi redia thet naut reda, sa vndvnge ma mith thrim ethum. $159 (= Rq. $167). Fon tha hauerwm. Etta husem buta wagem vrtie alrec mon thre fet to there sueththa; fon tha hawerwm and fon alle logungum ist alsaden $160 (= Rq. $168). Fon tha slatem. Hwasa welle slata inna fennem ieftha inna medum ieftha inna aenge loge, and sin suethenat hine nelle naut meta, sa monie hi hine mith sine redia; therefter winne hine slat and thet hore oppa eider sida, and thi slatere biweriene esna mith sinre sele, and thi redia driwet forth. $161 (= Rq. $173). Fon brewim. Thet wellath Brocmon, thetta rediewena kokar hebbe thera liuda bref inna hira were and riuchte alderbi, and skel mene wesa tha fiuwer rediewem, alsa ofta sa hia bihowiath eta nesta thinge bi tuam hageste mercum, and lete thet bref lesa hoke papa sa hia welle, alsa thet thi redia resze achta merc and sin hus bihalde oppane lesta dei; and sprech thi hana, thet ma him vnriucht due bi sine eyne brewe, sa kethe ma tha othere tegadera; sziwie hia thenna, sa skethe thera muneka bref thet. $162 (= Rq. $174). Fon tichtegim, ther naut inna brewe nis. Alsar sketh en thictega, ther naut nis inna brewe, sa endigie tha redia thene bi liuda skiffene, and efter lidsze mane inna thet bref, alrec hira bi achta mercum, hit ne se, thet hine fon skirie. $163 (= Rq. $169). Hwersa thi fene leith bi tilade londe. Hwersa thi fene leith bi tilade londe, sa skel ma fon tha riuchta tia vrtia thre fet, ief mar enne slat makia welle, sa nime thet tilade lond sine eyne erthe. $164 (= Rq. $170,171). Fon sziwa vmbe erthe. Hwersa ma sziwath vmbe erthe, ther is inna slate bi tha werwe, sa nime hi tha erthe, therne slat ach; ief hia sziwe vmbe thene slat, sa bidele thi redia thet; ief thi werf ducht, sa nimere alsa stor, sare mittha scote winna muge; nel thi, therne slat ach, sin naut vpskiata, sa monie hine tofara sine redia, sa haunie hine slat. $165 (= Rq. $172). Alsare szegongar send, sa haunie thiu gred tha fiarda ierde. $166 (= Rq. $175). Fon ieftim, ther ma deth, alsa ma kemin is invr bedselma. Alsa thi menneska kumith invr bed and bedselma, sa ne mey hi nanene monne naut resza withes erwa willa; vnder tha susterna bernum mot ma resza ene engleske merc. $167 (= Rq. $176). Fon ieftim, ther thi prestre dua mey oppa thene lesta ende. Thi prester mot resza sine thianestmonnum vnder susterna bernum achta merc and alsadene clathar, sa hi him makad heth. Alsa longe sa hi elte and sund is, sa se hi sines godes elle weldech and mot iewa, hwamsare welle, andte forme ieft skel stonda bi rediena worde, ief se biseten se ier and dei. Fon tha gastlika iefthim vmbe tha sele. And ney tha gastlika riuchte skelre weldech wesa oppa thene lesta ende to iewande vmbe sine sele. $168 (= Rq. $177). Thi papa mot nene lena waria. Thi prestere ne mot nenra wraldeskera lena plegia, wara sines eynes ombethes, ther hi to ewiged is; wel hir aeng liudamon thene prestere halda inna lene, sa geie hi mith achta mercum. $169 (= Rq. $178a). Fon benethe wasa vndad wert. Alsa thi menneska wndad is, sa skeppe hi sine eyne benethe tefara sine papa and tefara sine redia; sziwie hia, sa skel thi redia biherda; is hi vnsprekande and hi hebbe eppa deda, sa vnge tha erwa oppa hwene sa hia welle mith tuelf ethum; and naut ma sa enis ne mot ma benethia and enne bona te makiande; thisse benethe skel ma dua vper bere and vper benke and vper epene grewe, alsa fir sa ma ield hebba welle; thet skel thi redia vnder sete driwa thes selwa deis, hweder sa hit falt to tha hagra sa to tha legera, bi achta mercum and bi tha huse. $170 (= Rq. $178b). Fon skeldim, wasa enne mon sleyt. Hwersa thi other mon slaith thene otherne, sa ne mey ma naut ma sa inbold to skeldum makia, and thet quic and thet ha and thet hus and thet lond bihalden se, and thes halsis wathia. $171 (= Rq. $179). Fon lawim, hwersa thi brother sleith thene otherne. Hwersa thi brother sleith thene otherne ieftha thi sune thene feder and hia skelin lawa lewa, sa ne skel thi bona of tha lawen naut nima, and sa resze hi sextich merca tha liudem to fretha, and thet hus thera liuda. Ne skel hi nena lawa leua, sa se thet ield and tha bota enfaldech; ac skema lawa lewa, sa se tha bota and tha lemethe enfaldech; fon there suster and fon there moder set alsaden. $172 (= Rq. $180). Fon lawim. Hwersa mar enne mon slait, ther lawa lewa skel, sa ne skel thi bona of tha lauen naut nima, wara thi, ther alra nest kniaid is; sa resze hi tha liudem sextich merca, and sin hus thera liuda; and ne mey hit naut fella, sa stondet oppa sinne hals. $173 (= Rq. $181). Hwersa thi mon wergat sin wif. Hwersa thi mon wergat sin wif, ieftha thi hera ieftha thiu frowe ieftha thi sviaring ieftha thiu snore, aeng thira wirgat thene otherne, and hira sziwe se burkuth, and tha redia se thria clagad, sa ielde ma se mith thrim ieldum and tha wif thrimne further and tha liudem sextich merca te fretha, and thet hus thera liuda, and tha redia nime alsa monege halwe merc, sare ielda vtvnge; and nist naut eclagad, sa set enfaldech. $174 (= Rq. $102). Fon vrwalde dedum. Alla vrwalda deda, dyares deda, spildeda, alle becwarda deda ful ield and fulla bota and nenne frethe. $175 (= Rq. $183). Fon vnbotum. Vverther en mon wndad oppa sin haud and ther en hlenszene se, tha wnda te betande efter there mete, and thiu hlenszene tuene skillingar. $176 (= Rq. $184). Fon vnbotum. Vverther en mon eslain oppa sin haud and thet blod eta arem vphlape and etta muthe, thera mutha ek en skilling and eyder nostern fiuwer penningar. $177 (= Rq. $185). Fon botum. Vverther en mon eslain oppa sin haud mith ene bame and hebbe te auwande wedlingar ieftha blodelsa, and thi redia thet rede, and werthe loma, sa stonde hit ier and dei; sa resze ma him te bote en thrimin ield. $178 (= Rq. $186). Fon vnbotum. Vverther en mon ewndad anda sine tunga and him se sin spreke binimen, sa stonde hit ier and dei; sa resze ma him te bote en half ield, ief thi redia thet ret, thet hi vnsprekende se. $179 (= Rq. $187). Fon vnbotim. Vverther en mon evndad, thet him sin spreke ieftha here ieftha thera other werthe binimen, sa stonde hit ier and dei; sa resze ma him te bote en half ield, ief thi redia thet ret. $180 (= Rq. $188). Is him sin spreke ieftha here thera other ewert, sa ist en fiardandeles ieldis and thi frethe, alsa hit berith bi tha ielde. $181 (= Rq. $189). Alla wnda skel ma beta mith fulre bote, buta tha litha, theron is thiv lithlemethe, tha wnda skelin lidsza gresfelle. $182 (= Rq. $190). Fon vnbotim. Fot and hond of and thet age a colek en half ield; fot and hond and age thrimne further. $183 (= Rq. $191). Alsa thet blod of tha aga rent, tuene skillingar. $184 (= Rq. $192). Thi thuma and thiu were of, and thet are and thiu nose of, en fiardendeles ieldes. $185 (= Rq. $191). Hwersa thet age a blode hwerft, en skilling. $186 (= Rq. $193). Thi thuma and thiu were and thet are half of and thiv nose afara of se, kemth hit of tha skerde, tha deda te betande efter mete. $187 (= Rq. $194a). Metedolech en skilling. $188 (= Rq. $194b). Hwersa hit ne mey nauder her ny halsdoc bihella, thrimne further. $189 (= Rq. $195a). Thi toth a farahaude of, tuene skillingar. $190 (= Rq. $195b). Hernteth achtene penningar. $191 (= Rq. $196a). Thiu kese en skilling. $192 (= Rq. $196b). Tuskes bite en skilling, and fiuwer te betande. $193 (= Rq. $196c). Hwndes tusk alsa stor. $194 (= Rq. $197a). Thera fiuwer fingra alrec en half merc, sa istera litha alrec tuene skillingar. $195 (= Rq. $197b). Thi neyl of tha fingrum, en skilling. $196 (= Rq. $197c). Tha tana alsa stor sa tha fingrar. $197 (= Rq. $198). Benfrotha anda thuma and anda nosebene, tuene skillingar. Ister en efsivne thre skillingar. $198 (= Rq. $196d). Benfrotha anda knoclum and andare honbrede, tuene skillingar. Ister en sivne thre skillingar. $199 (= Rq. $198a). Benfrotha andare hondbrede and anda widebene, fiuwer skillingar; there wiwe thrimne further. $200 (= Rq. $198b). Benfrotha anda ribbem, a fingrum, a tanum: en skilling. $201 (= Rq. $198c). Benfrotha a ermem, a benem and anda szinbacum, anda sculderbene and a henszebene, fiuwer skillingar. Ister en efsivne achta skillingar. $202 (= Rq. $199). Fon vnbotum. Vverther en mon ewndad anda sine henszesine and him sine erim driapande se and loma, en thrimin ield. $203 (= Rq. $200). Fon vnbotum. Vverther en mon ewndad anda sine waldandsine and him werthe sin other side loma, en half ield. $204 (= Rq. $199). Fon vnbotum. Vverther en mon ewndad anda sinne erim and him werthe sina sina curuen and thiu hond driape, sa skel ma him resza alsa stor, sa tha fiuwer fingrar to bote winna muge, ief se of were, and thiu dede skel lidsza. $205 (= Rq. $201). Fon vndim, ther ingong and vtgong hebbat. Ief ther en mon ewndad werth, and thi redia thet onlede, thethet invr thene wach ekemen se, tuene skillingar; heth hit enne ingong and enne vtgong, thet falt half te betande and half naut, thi ingong enne skilling and thi vtgong enne otherne. $206 (= Rq. $202). Werther en mon eberned, thene bront skel ma meta ondling and thweres vr. Vverther en mon eberned, thene brond skel ma meta ondling and thweres vr anda sine liwe and efter te betande. $207 (= Rq. $203). Fon blodelsa. Blodelsa and wedling and festeslec and thi lhem alrec fiuwer penningar. $208 (= Rq. $204). Fon tha dadsvima. Thi hagera dadsvima tuene skillingar, thi legera en skilling; ief hi heth ene inrweze dede jeftha ene hauddede, thene hagera mith tuam ethum te biweriande and thene lessa mith enem. $209 (= Rq. $205). Fon tha svarta svenge. Thi svarta sveng en skilling. Thiu hagere wepeldepene tuene skillingar, jef him her and halsdoc wet werth. Thiu legere en skilling, jef him sine clathar wet werthat. $210 (= Rq. $206). Delefel sex penningar, there wiwe nyvgen. $211 (= Rq. $207). Fonre soldede. Thiu hagere soldede fiuwer skillingar, mith fiuwer ethum te haliande. Thiu midleste tuene. Thiu legeste enne; there wiwe thrimne further. $212 (= Rq. $208a). There wiue strewene fiuwer skillingar, thet thet her of tha hokka se, thet te biweriande mith tuam ethem. Thiu legere en skilling, mith ene ethe te haliande. $213 (= Rq. $208b). Hwasa kerft of there wiue hire hocca. Hwasa kerft of there wiue hire hocka, sa istet fulscondlic and nis naut skethelic; sa resze ma hire to bote en fiardandel hiris eynis ieldes, and thi frethe alsa stor, ief thi redia thet onlet and hiv thet biret mith tuam triuwe witem. $214 (= Rq. $209). Fonre bernis berde. Andere bernis berde tuene monathar nen ield, there moder hiris liwes en hageste merc te bote; anda letera tuam monathum there bernis berde achtene skillingar te ielde; anda fifta and anda sexta monathe en half ield; anda sogenda en hel ield, and alrec thera monatha en hageste merc, thet send sex merc; thit te biweriande mittha prestere and mith tuam triuwe wiwen, hut andere berde sken se; thius keme skel wesa binna thrim etmeldem efter there case; stent hit thervr, sa vndvnge ma mith fiuwer and tuintich ethum; falt hit to dadele, sa skel ma tha moder and thet bern mith fulle ielde ielda and enne frethe te reszande. $215 (= Rq. $210). Strichhalt and stefgensza, stareblynd, breynsiama and lungensima, jef thi erm naut homerhaldande se, en thrimne ield. $216 (= Rq. $211). Fon inruesze dedim. Alla inruesza deda, thet is breynsima and lungensyma, ther invrne wach kemen send, tha skel ma biweria mittha redia, ther thenna weldech is, and skel ma bisetta etta mena scrifta and stonda ier and dei and talia fon tha dei, ther thiu dede erist den is; nimth ma tha bota, sa skarie ma se anda thet ield, and tha lamethe skel ma ac bisetta, wara thi redia ne thur naut reda. Lif and lemethe skel ma mith londe bisetta. $217 (= Rq. $212). Keremen hebbath thit bikeren, and alle liudem wast liaf, thet tha redia sette enne mon oppa thera liuda werf, ther thene haunie mith liszene and mith suepene, sa hi alra beste muge, and sitte alderoppa to liwes ende, thet is Thadward Iainmonna; and inna sine huse skelin se achtia buta husherem; and efter sine liwe hebbe tha redia tha wald, hwene hia oppa thene werf sette; and wet redia sa elles te ene otherre huse achtath, sa geie hi mith fiuwer mercum. $218 (= Rq. $213). Fon lithe. Sa kiasat Brocmen thet to enre kere, thetter en fele lith ne mote wesa binna Wibaldinga szerspele bi achta mercum and bi tha huse; halath hit aeng mon and hi ne muget naut fella, sa stondet oppa sinne hals; thet skelin wita tha tuene, ther vr hine sweren hebbat, hweder hit ehalden se sa naut; halt math naut, sa kethe hia tha sithum and hia riuchtet; and ne riuchtat hiat naut, sa brensze set inane warf, and alrec hira geie mith achta mercum, and tha tuene se fri; and alsa tha frethar vteketh se, sa nyme tha nya thet a hond bi aldusdenre geie. $219 (= Rq. $215a). Renald Hengana, tha hi redia was and kethere, tha kas hi and alle sine sithar thissa kera, and alle liudem wast wille. $220 (= Rq. $215b). Fonre szurka. Hwersa mar ene tsziureka bifeth, sa reke ma tha liudem hunderd merca to fretha and tha helegem sexthech merca, and alle, thet ma ther bifivcht, thet skel thi fella, ther tha szurka bifeth, a tuira wegena and thribete, hit se dadele ieftha deda ieftha lemethe; alsa monege sar onvngath, alrec hunder merca tha liudem, iefheret fella muge; ne mey hit naut fella, sa stonde hit oppa sinne hals. Ist en huthemede wnre, sa felle thi hauding therfore hunder merca; and alsa monege sa ther onvngath, alsa monege hus to bernande, and alsa monege hunder merca to reszande, and thet godeshus alsa god withe to makiande, sa hit er was. $221 (= Rq. $216). Fonre mura. Hwersar mura ieftha grefta vmbe tsyurika send and hwasa se bifeth, alsadenne frethe sa thiu tszurke. $222 (= Rq. $217,218). Fon tha monne, ther flivth inna tsyurka. Ief hir en mon flivth inna tsyureka and tha fivnd hine theron gelath, al thet hi thenna bire nedwere deth, thet lidse gresfelle; wirgath ma hine theron, sa gelde ma hine mith fiftahalwe ielde and tha liudem hunder merca, and thet hus thera liuda. Nel hi thenna naut ofvnga, alsa tha fiund fonvngath bi helgenamonna and bi rediewena worde, sa resze hi alsa stor alsa thi, ther tha tsyurka bifeth; and hwasare enne mon asleyt innare tsyurika, sa resze hi hunder merca tha liudem and sexthech tha helegum. Nellath hia of there tsyvrka nauvet vnga, therre thenna on send, sa vnge thi redia, ther vr tha tsyurka sueren heth, and kethe se of; nellet hia nawet ofvnga, sa berne hi thet forme beken bi achta mercum thes selwa deis; and ne vngat hia thenna naut of, sa berne alle sine sithar tha bekene thes letera deis and sogenie tha liude, alrec hira bi achta mercum; and hoc hira sa tha bekene naut ne bernt and sine liude naut ne brenth, sa lede ma oppa hine alra erest; and fivth hi with tha sithar, sa felle hit a tuira wegena. $223 (= Rq. $219). Fon tha bogere. Hwersa mane bogere ieftha enne selsketa breng to there case, alsa monege sare se, alsa monege achta merc reke thi hauding tha liudem; hwerth thi bogere asleyn, sa lidsere gresfelle; ac herth hi vter lond and ma spreke vmbe thet ield, sa stonde thi hauding ther tofara, therne inelet heth. $224 (= Rq. $220a). Fon dadlem, ther ma binna wagim deth. Hwersa mar enne mon vta huse bernt ieftha inne wirgat ieftha vtgelt and ma hine thenna wirgie, sa ielde ma hine mith thrim ieldum, and thet bonahus berne ma, and hunder merca tha liudem; and alsa monege sare wirgat werthat inne ieftha vte etere case, alsa monege hundert merca tha liudem, and alsa monege hus te bernende. $225 (= Rq. $220b). Hwersar ena bara send en merc, sa skel mar campa; ist lessa, sa suere mar on. $226 (= Rq. $220c). Fon nedkestum. Hwersar sketh en nedkest and thet due fule monna, sa ne mot mar naut ma sa enne hauding makia; hit ne se, thet thi redia se withedriwe, sa halde ma tha alda kera. $227 (= Rq. $220d). Hwersar is en somnath and hir ne se nen thingath and hir ne kethe ma nen thing, sa se hit enfaldech. Hec littera scripta est per manus Osbrondi anno domini Mo.CoCoCo.XLo.Vo. Confirmatio istorum iam predictorum nec non subsequentium irrefragabiliter debet obseruarj.